Öz deviriniñ belli münevveri Muhammed Şefiq Kefeviy Qırım padişalığınıñ şarq qısımında yerleşken Kefe (Feodosiya) şeerinde doğdu, XVI-ncı yüzyıllıqnıñ soñunda. Balalıq çağından bilgige meil Bergen Muhammed, ilki tasilni doğmuş toprağında, daa doğrusı ilim-fen ve aynı zamanda iqtisadiyat ceetinden bayağı ileri ketken Kefede ala. Soñra, oquvını devam yapmaq maqsadında o, Könya şeerine (Türkiye) barıp çıqa.

O mında belli din erbapları – ülemaları (alimleri) ile tanış ola, olarğa yaqınlaşa, olar sayesinde daa teren bilgi çoqrağından qana-qana suv içe… Neticede, Muhammed Şefiq Kefeviy büyük ilim-fen basamaqlarınıñ yuqarısına köterile. Onıñ yazıp qaldırğan risaleleri – ilmiy mirası derslik sıfatında dünyanıñ çeşit ilâhiyet universitetlerinde qullanılmaqta.

Muhammed Şefiq Kefeviy meşur ülema – alim oluv ile bir sırada, o nazm satırlar yaratuv üzerinde de kendi qalemini çalıştırdı. Yani, bu zatı aliyleri halq arasında felsefiy şair olaraq da bellidir.

Bazı bir malümatlarğa köre Muhammed Şefiq Kefeviy 1671 senesi vefat etti. Allahnıñ rahmetinde olsun.