Къырымгъа къайтып кельгенден берли, эр сене майыс 18-де къадимий Акъмесджит шеэрининъ меркезинде отькерильген Матем митинги башланмаздан эвель, мен мейдангъа якъын олгъан Парламент бинасы къаршысында – кошеде ерлешкен Рессамлар Бирлиги идаресининъ сергилер залыны зиярет этем. Мында, Матем куню мунасебетиле, Ветанымыз Къырым эм де къырымлыларгъа аит ве айны заманда бир къач сюргюнлик – репрессия иле багълы тасвирий санъат эсерлери де нумайыш япыла.
Сёйлемек истегеним, бу сефер де, бир таныш аркъадашым иле берабер мезкюр серги залында булундыкъ. Сергиге къойылгъан тасвирлер арасында чешит мевзуда ве чешит севиеде ишленген эсерлер ер алгъан. Базы бир тасвирлерни козеткенде, истер-истемез эдждадларымызнынъ, къазанда олса чомючке де тюше, деген икметли фикирлерини хатырладыкъ. Мезкюр фикирни бугуньки мевзумызгъа келиштиреджек олсакъ, къарарле бойле демек мумкюн: «Маяда олса, фырчы да чалыша, барып да маяда олмаса, фырчы сачмалай». Бойле дегеним себеби, сергини сейир эткенде Рустем Эминов ве базы дигер рессамларнынъ юксек севиеде яратылгъан тасвирий эсерлери иле бир сырада, сейирджини шашмалаткъан сачмалав ресимге де козюмиз тюшти.
Белли бир рессамымыз тарафындан сызылгъан «Комендантнынъ узурында» серлева астындаки буюк форматлы тасвирде ярыкъ, темиз-пак одадаки маса башында гунясыз къозучыкъны анъдыргъан арбий урбада комендант отура. Онынъ къаршысында кене темиз-пак, аман-аман о девирдеки министрлер костюминде-урбасында булунгъан адам имза чеке, онынъ янында кене гузель кийинген ханым ве иляхре… Комендант къаршысындаки эркекке ве къадынгъа оларнынъ чехрелерине – тыш къияфетлерине дикъкъат этильсе, санки дерсинъ бу къырымлылар акимиет векиллери раатлангъан имтиязлы санаториеде раатланмакъталар…
Тасвирде акс этильген левха, о дешетли фаджиалы сенелерде, комендант джеллятлары элинде пичен киби къырылып кеткен бинълерле семетдешлеримизге нисбетен акъарет денильсе, аслы да мубалягъа олмаз.
Догърудан – догъру комендант акъта, комендант режими хусуста чешит муэллифлер тарафындан сыра-сыра публикациялар, эсерлер язылды. Меселя Юрий Османов озюнинъ ильмий-сиясий ишлеринден бирисинде, сёз сырасы бойле фикирни ачыкълай: «…корчась от голода и эпидемий под сапогом комендантов крымские татары объявленные позором природы, сотнями тысяч подыхали в Средней Азии, на Урале, в Сибири, Туле…».*
Экинджи джиан дженки джэбе ёлларыны башындан сонъунадже басып кечкен, дефаларджа яралангъан ве Алланынъ икметиле сагъ къалгъан буюк языджы Шамиль Алядин, Меркезий Асия койлеринден бирисинде, комендант чызмасы тюбюнде эджель иле курешкен къорантасыны тапа… Иште, о вакъытлары Андиджан веляетининъ Чинабад район меркезинде (Озьбекстан) Шамиль Алядин ве комендант арасында бойле лакъырдылар олып кече:
- Вы взяты на учёт. Без моего письменного разрешения из района ни шагу! Понятно?
- Не совсем. Я вернулся с фронта, имею награды…
- Что вы все за недоумки какие-то, ничего не понимаете с первого раза?! Про фронт, про награды мне талдычите! Может, вас тоже на двадцать лет за Полярный круг отправить, чтобы научились все сразу понимать?!
- Как вы со мной разговариваете? – не выдержал я. – С офицером, старшим по чину?!
- Ха-ха!.. – деланно рассмеялся он, поднимаясь с места и большими пальцами обеих рук вправляя под ремень гимнастерку. – Нашёлся старший… Я для вас – царь и Бог! Зарубите это у себя на носу! Вопросы есть?**
Иште, тек эки мисаль – бириси къырым миллий арекетининъ атешин курешчиси ве айны заманда белли тедкъикъатчынынъ араштырувларындан келип чыкъкъан ильмий-нокътаий назар олса, экинджи мисаль исе, белли эдипнинъ корип кечиргенлеридир.
Эбет, бойле мисаллерни бабаларымыздан, аналарымыздан, деделеримизден, къартаналарымыздан дефаларджа эшиттик. Гъурбет ерлерде, комендантлар панджасында эляк олгъан эдждадларымызны, оларнынъ чеккен истирапларыны унутмамалы, Эр кересинде, элимизге фырчы я да къалем алгъанда акъикъатны, ялынъыз акъикъатны тасвирлемели, ифаделемели, косьтермели. Бунынъ акси исе, о я да бу фырчы ве къалем саибининъ маясы гъает зайыф экени нумайыш олуна. Бойле зайыф мая вастасы иле догъгъан «эсер»нинъ омюри де чокъкъа бармай, о тек бир саниеге – бир аньгъа сюрюле. Бу да акъикъат!
акъарет – оскорбление
ань – миг
акъикъат – правда, истина
атешин – пламенный
дефаларджа – многократно
дешетли – жуткий, страшный, ужасный
джеллят – палач
джебэ – фронт
зайыф – истощённый; слабый
икметли – мудрый
левха – зарисовка; вид, картина
матем – траур; траурный
мая – закваска; дрожжи
нумайыш – демонстрация, представление, показ
пичен – сено
Рессамлар Бирлиги – Союз художников
саиби – хозяин
сачмаламакъ – путаться; говорить глупости, чепуху молоть
серги – выставка
тасвирий санъат – изобразительное искусство
тедкъикъатчы – исследователь
комендант узурында – у коменданта
фаджиа – трагедия
фырчы – кисть
чомюч – черпак, поварёшка
чызма – сапог
эджель – смерть, кончина; естественная смерть