Дертли къавал гонълюм киби инълеюр,

Юрегимнинъ аджысыны алаюр.

Яраларгъа мельэм олур хош сесинъ,

Инъле, къавал, дертлеримни сен сустур.

Меним анам яшлыгъымда ольмюштир,

Тайфаларым эписи оксюз къалмыштыр.

Ах, нейлейим? Бабам да огей алмыштыр!

Инъле, къавал, дертлеримни сен сустур.

Бу да ешиль дагъ амма, о дагъ дегиль,

Бу да ешиль багъ амма, о багъ дегиль.

Ах, нейлейим? Анам да бабам сагъ дегиль!

Инъле, къавал, дертлеримни сен сустур.