Kompozitor, yırcı, qırım milliy halq türküleriniñ aqiqiy icracısı Osman Asanov (Abit oğlu) Qırımnıñ Aluşta rayonına baqqan Kuçuk Köy köyünde doğdu (1923 senesi, dekabr 24). Mektepni bitirgen soñ, Pötr Çaykovskiy adına Aqmescid muzıka oquv yurdunda tasilini devam etti. Velâkin ekinci cian cenki başlanğanı sebep, o, mezkür oquv yurdunı bitirip olamadı.

O, qırğınlıqqa (genotsidke) oğratılğan doğmuş qırım halqı ile beraberlikte Merkeziy Asiyağa tüşti. Sağ-selâmet qalmaq içün onıñ yapmağan zenaatı – işi qalmadı.

Osman Asanov 1955 senesi Namanğan şeerinde (Özbekstan) Qırım milliy aveskârlar ansamblini meydanğa ketirdi.

O, Aqmescid muzıka oquv yurdunda oqup başlağan velâkin bitirip olamağan tasilni, taqdir mücibi Namangan muzıka oquv yurdunda devam etti. Mezkür oquv yurdunı bitirgen soñ Taşkent devlet konservatoriyasınıñ vokal sınıfına kirip oqudı. Konservatoriyanı 1976 senesi bitirdi.

Osman Asanov Taşkent şeerinde teşkil olunğan Qırım milliy oyun ve yır Haytarma ansanblinde yırcı (vokalcı) em de kemaneci (1957 – 1964), soñra Ferğana şeerinde (Özbekstan) muzıka mektebinde oca vazifelerinde faaliyet kösterdi. Ferğana tekstil kombinatınıñ Medeniyet sarayında "Horan" namında qırım milliy ansamblini meydanğa ketirdi.

Osman Asanovnıñ repertuarını esasen "Ural dağı", "Tatarlığım"… kibi bir talay Qırım halq türküleri – incileri teşkil ete. Ebet, sañatkâr özbek, rus, ukrain yırlarnı da ğayet yüksek mearet ile icra etip bardı. O, kompozitor olaraq sıra-sıra yırlar yazdı. Meselâ, "Yalta tangosı", "Gülcian", "Navrez türküsi" ve digerleri işte bular cümlesindendir.

Büyük sañatkâr Osman Asanov 1991 senesi kendi beşigine – Qırımğa qaytıp keldi.

1999 senesi Osman Asanov "Ukrainada hızmet köstergen artist" unvanı ile taqdirlenildi.

Qırım milliy sañatında büyük iz qaldırğan ve aynı zamanda doğmuş sañatınıñ inkişafına özüniñ salmaqlı issesini qoşqan Osman Asanov 2005 senesi noyabr ayında Aqmescid şeerinde 83 yaşına kelip vefat etti. Allanıñ rahmetinde olsun!