"Sesli eserler" saifesine buyurğan ürmetli dostlar, bu saifeni açmaqtan maqsad, Qırım toprağınıñ ğayet aenkli tiline, onıñ telâfuzına muracaat etip, ondan maneviy ğıda almaqtır. Haq Taalâ qırımlarğa bağışlağan bu aziz ve dülber topraq kibi, onıñ tili de, medeniyeti de… er şeyi öyle dülberdir. Em kerçek, başqa türlü olması da mümkün degil. Bu da aqiqat!

Bunıñ daa bir aqiqat yeri şunda ki, bu aziz topraq doğurğan qadimiy ve aynı zamanda daima genç qırımlarnıñ edebiyatı da, tarihı da çal asırlar ile aqrandaştır. Başqaca söyleycek olsaq, bu muqaddes topraqta doğğan edebiyat ve şu edebiyatta kendi aksini tapqan zengin tarih ep yaşamaqta. Bazı da Qırım milliy edebiyatı, tarihiy aralıqlar (pauzalar) yapsa bile, o toqtamay, o ep inkişaf ete. Olsun milliy edebiyatı, olsun edebiyatnıñ temelini teşkil yapqan halq ağız yaratıcılığı – episi yavaş-yavaş adımlarle olsa da, ep ilerilev ceryanında bulunmaqta.

"Vetanımnıñ hoş aenki..." saytınıñ aziz mühlisleri, işte, siziñ diqqatıñızğa, qırım milliy edebiyatından em de qırım halq ağız yaratıcılığından – folklordan nümüneler avale etile. Mezkür hazine nümünelerini Yusuf Ali (Hapıshorlı) ve Leylâ Emir oquylar.