Композитор, йырджы, къырым миллий халкъ тюркюлерининъ акъикъий иджраджысы Осман Асанов (Абит огълу) Къырымнынъ Алушта районына бакъкъан Кучук Кой коюнде догъду (1923 сенеси, декабрь 24). Мектепни битирген сонъ, Пётр Чайковский адына Акъмесджид музыка окъув юрдунда тасилини девам этти. Велякин экинджи джиан дженки башлангъаны себеп, о, мезкюр окъув юрдуны битирип оламады.

О, къыргъынлыкъкъа (геноцидке) огъратылгъан догъмуш къырым халкъы иле бераберликте Меркезий Асиягъа тюшти. Сагъ-селямет къалмакъ ичюн онынъ япмагъан зенааты – иши къалмады.

Осман Асанов 1955 сенеси Намангъан шеэринде (Озьбекстан) Къырым миллий авескярлар ансамблини мейдангъа кетирди.

О, Акъмесджид музыка окъув юрдунда окъуп башлагъан велякин битирип оламагъан тасильни, такъдир муджиби Наманган музыка окъув юрдунда девам этти. Мезкюр окъув юрдуны битирген сонъ Ташкент девлет консерваториясынынъ вокал сыныфына кирип окъуды. Консерваторияны 1976 сенеси битирди.

Осман Асанов Ташкент шеэринде тешкиль олунгъан Къырым миллий оюн ве йыр Хайтарма ансанблинде йырджы (вокалджы) эм де кеманеджи (1957 – 1964), сонъра Фергъана шеэринде (Озьбекстан) музыка мектебинде оджа вазифелеринде фаалиет косьтерди. Фергъана текстиль комбинатынынъ Медениет сарайында «Хоран» намында къырым миллий ансамблини мейдангъа кетирди.

Осман Асановнынъ репертуарыны эсасен «Урал дагъы», «Татарлыгъым»… киби бир талай Къырым халкъ тюркюлери – инджилери тешкиль эте. Эбет, санъаткяр озьбек, рус, украин йырларны да гъает юксек меарет иле иджра этип барды. О, композитор оларакъ сыра-сыра йырлар язды. Меселя, «Ялта тангосы», «Гульджиан», «Наврез тюркюси» ве дигерлери иште булар джумлесиндендир.

Буюк санъаткяр Осман Асанов 1991 сенеси кенди бешигине – Къырымгъа къайтып кельди.

1999 сенеси Осман Асанов «Украинада хызмет косьтерген артист» унваны иле такъдирленильди.

Къырым миллий санъатында буюк из къалдыргъан ве айны заманда догъмуш санъатынынъ инкишафына озюнинъ салмакълы иссесини къошкъан Осман Асанов 2005 сенеси ноябрь айында Акъмесджид шеэринде 83 яшына келип вефат этти. Алланынъ рахметинде олсун!