Бекир Мамут
КЕЛЕДЖЕГИНЪ БАР, МИЛЛЕТИМ!
Киммерлер, тавэрлер
Эдждадлар сенинъ.
Чёль, ялы, дагъ ерлер,
Юрд адлар сенинъ.
Танърыдан эдие
Бу Ешиль Ада.
Онъа «Сагъ Ол», дие
Яша дюньяда!
Куреш – омюр, оюнъ,
Такъдиринъ… Демек,
Эр бир кунь, йыл бою,
Курешмек керек.
Шубеленмек олмаз –
Келеджегинъ бар!
Душманларынъ онъмаз –
Енъеджегинъ бар!
Макъсадкъа иришмек
Исрарлыкъ кефиль.
Акъкъынъа киришмек
Акъылынъ феим.
Огге эп кет сен, эй,
Къырым миллети!
Коклерге етсин, эй,
Шанынъ-шуретинъ!
Алемге бу аит:
Ал танъ арада
Оладжанъ сен саип
ВЕТАН-АДАГЪА!