Бунъа «Ешиль ада» дерлер, юдже маали Чатыр дагъ,

Бунынъ бир тарафы чёльдир, бир тарафы багъча-багъ.

Келир сувлар яйлялардан, не гузельдир бойлары,

Алтын ашлыкъ тарлалары, къозулары, къойлары.

Отер къушлар саба-акъшам, олур язда гулистан,

Эр не тараф гозь идерсенъ – алтын ашлыкъ, багъ-бостан.

Пек гузельдир аб-авасы, яй ве джай, джай ве яй,

Шеэрлерин эскилери – Къарасув, Багъчасарай.

Доп-долу эди халкъымызле Ешиль ада бир заман,

Аз дегильди юртумызда менла, батыр, къараман.

Зевал кельди, юрт бозулды, къач ве кочь алдав иле

Гитти халкълар, гельди ятлар башкъа ал ве диль иле.

Унутманъыз чоджукъларым, Къырым сизинъ Ветандыр,

Саип олунъыз бу Ветана чалышып эдеп иле.

Бунъа «Ешиль ада» дерлер, юдже маали Чатыр Дагъ,

Бунынъ бир тарафы чёльдир, бир тарафы багъча-багъ.

Аман, огълум, сатма сакъын, элинъдеки топрагъы,

Ананъ киби сени беслер берекетли къучагъы.

Пичен, арпа, аш истемез, верир санъа бунлары,

Сефиль-резиль олма сакъын, сатып Ана топрагъы.

Едиклеринъ, ичдиклеринъ эп бу топракътан келе,

Джебинъдеки акъчалары санъа бу топракъ вере,

Алма, армут, арпа-богъдай, багъ ве бостан джумлеси –

Топрагъынъ вердиги байлыкъ… Сатма, сакъын топрагъы…

Оны билип, севмелисинъ чайыр иле багъчайы,

Акъча сувдыр, акъар китер, битирирсинъ акъчайы.

Багъча китти, акъча битти, не олур сенинъ алынъ?

Аман, огълум, топла акъча, кери къайтар багъчайы.

Бакъ, сенинъ бир чайырынъ вар… Не гузельдир чокърагъы,

Шырыл-шырыл келе суву, ярып къара топрагъы.

Лянет идер санъа чокъракъ, сатма, сакъын чайыры,

Эгер сатсанъ, чевирирсинъ феная сен хайыры!

Сач тарлая арпа, богъдай, ишле, бекле тарлайы,

Бир сачарсынъ – он алырсынъ, унутмайып Худайы.

Бир чувал богъдая къаршы, алтын кумюш верирлер,

Кереклеринъ эр не исе – бунлар иле келирлер!

Аман, огълум, сатма сакъын, элинъдеки топрагъы,

Ананъ киби сени беслер берекетли къуджагъы.

Пичен, арпа, аш истемез, верир санъа бунлары,

Сефиль-резиль олма сакъын, сатып Ана топрагъы.