Алуштадан эскен еллер –

Юзюме урды.

Балалыкътан оськен ерлер –

Козюме тюшти.

Мен бу ерде яшалмадым,

Яшлыгъыма тоялмадым,

Ветаныма асрет олдым,

Эй, Гузель Къырым!

Юрдим сенинъ ёлларынъда

Севе-севе мен,

Ветанымда яшамагъа

Пек истерим мен.

Алып кельдим селям санъа,

Санъа асрет миллетимден.

Къучагъыны ач сен манъа,

Эй, гузель Къырым!

Багъчаларнынъ мейвалары

Бал иле шербет.

Сувларынъны иче-иче

Тоялмадым мен.

Ешиль дагълар кульди манъа,

Къайтып кельди къырым санъа,

Къучагъынъы ач сен манъа,

Эй, гузель Къырым!