Маарифчи, алим, публицист, Педагогика илимлерине намзет Лейля Нурикъызы Асан Андиджан веляетининъ Асака шеэринде (Озьбекстан) догъды. Орта мектепни битирди, 1971 сенеси. 1971 – 1975 йыллары Майкоп шеэринде (Краснодар улькеси) Адыгей девлет педагогика институтынынынъ рус тили ве эдебияты болюгинде тасиль алды. 1996 сенеси исе, Акъмесджид шеэриндеки (Къырым) Таврия Миллий университетининъ къырым (къырымтатар) тили ве эдебияты болюгини де мувафакъиетле окъуп битирди.

Лейля Нурикъызы Асан орта мектеплерде, алий окъув юртларында къырым ве рус тили эм де эдебияты фенлери боюнджа муаллим чалышты. Биринджи сыныф талебелерининъ къырымтатар (къырым) тилинде лакъырды алышкъанлыкъларыны инкишаф этюв меселеси мевзуда ильмий иш язды. 2009 сенеси исе, айны шу мевзуда Киев шеэринде (Украина) диссертация къорчалады ве «Педагогика илимлери намзети» ильмий унванына малик олду. Рус ве къырым миллий филологиясы эм де педагогика илимлери боюнджа корюмли мутехассыс – алим Лейля Нурикъызы Асан энди баягъы йыллардан берли озю мейдангъа кетирген «АНА ТИЛИ ОДЖАЛАРЫНА» меджмуасыны идаре япа, яъни онынъ баш муаррири вазифесинде булунып, ильмий фаалиетини эп девам эте. Лейля ханым къорантасы иле берабер Акъмесджид шеэри къабыргъасында ерлешкен Ахтачы-Къыят коюнде яшай.

Тюрк дюньясынынъ буюк эрбабы Исмаиль бек Гаспралы талиматынынъ там манада девамджысы, сыра-сыра ильмий публицистика макъалелернинъ муэллифи Лейля Нурикъызы Асан вакъыт-ара тапкъанда кино санъатына да мураджаат эте. Лейля Оджа озю киби истидатлы къызы Эмине ханым иле бераберликте къырым миллий медениетине-эдебиятына аит весикъалы кинолевхалар ишлеп чыкъаралар. 2011 сенеси «Юсуф Али (Хапысхорлы)нынъ къырым миллий эдебияты акъкъында тюшюнджелери» серлевалы кинолевха иште бунъа ачыкъ-айдын мисаль ола билир.