Maarifçi, alim, publitsist, Pedagogika ilimlerine namzet Leylâ Nuriqızı Asan Andican velâyetiniñ Asaka şeerinde (Özbekstan) doğdı. Orta mektepni bitirdi, 1971 senesi. 1971 – 1975 yılları Maykop şeerinde (Krasnodar ülkesi) Adıgey devlet pedagogika institutınınıñ rus tili ve edebiyatı bölüginde tasil aldı. 1996 senesi ise, Aqmescid şeerindeki (Qırım) Tavriya Milliy universitetiniñ qırım (qırımtatar) tili ve edebiyatı bölügini de muvafaqiyetle oqup bitirdi.

Leylâ Nuriqızı Asan orta mekteplerde, aliy oquv yurtlarında qırım ve rus tili em de edebiyatı fenleri boyunca muallim çalıştı. Birinci sınıf talebeleriniñ qırımtatar (qırım) tilinde laqırdı alışqanlıqlarını inkişaf etüv meselesi mevzuda ilmiy iş yazdı. 2009 senesi ise, aynı şu mevzuda Kiyev şeerinde (Ukraina) dissertatsiya qorçaladı ve "Pedagogika ilimleri namzeti" ilmiy unvanına malik oldu. Rus ve qırım milliy filologiyası em de pedagogika ilimleri boyunca körümli mütehassıs – alim Leylâ Nuriqızı Asan endi bayağı yıllardan berli özü meydanğa ketirgen "ANA TİLİ OCALARINA" mecmuasını idare yapa, yani onıñ baş muarriri vazifesinde bulunıp, ilmiy faaliyetini ep devam ete. Leylâ hanım qorantası ile beraber Aqmescid şeeri qabırğasında yerleşken Ahtaçı-Qıyat köyünde yaşay.

Türk dünyasınıñ büyük erbabı İsmail bek Gaspralı talimatınıñ tam manada devamcısı, sıra-sıra ilmiy publitsistika maqalelerniñ müellifi Leylâ Nuriqızı Asan vaqıt-ara tapqanda kino sañatına da muracaat ete. Leylâ Oca özü kibi istidatlı qızı Emine hanım ile beraberlikte qırım milliy medeniyetine-edebiyatına ait vesiqalı kinolevhalar işlep çıqaralar. 2011 senesi "Yusuf Ali (Hapıshorlı)nıñ qırım milliy edebiyatı aqqında tüşünceleri" serlevalı kinolevha işte buña açıq-aydın misal ola bilir.