Saytımıznıñ mühterem musafirleri!

Bizler, siz kibi qonaqlarnı körmekten, daima memnünmiz!

Aziz dostlar, bizim saytımıznıñ maqsadı, qırım halqınıñ – milletiniñ edebiyat ve medeniyet dünyasına bir aralıq – pencere açmaqtan ibaret. Bizler, sizlerniñ de, bu meselede kendi isseñizni qoşıp, iştirak etmeñizni isteymiz. Yani, bütün dünyağa saçılğan halqımıznıñ tekrarlanmaz acayip til em de tarih nümünelerini tapmaq ve saqlap qalmaq kibi alicenap işte, sizlerniñ de yardımda bulunmañıznı arz etemiz. İkmetli ecdadlarımız da, halq üfürse – boran olur, dep, nafile yerde söylemediler.

Barıp da, siziñ eliñizde bizim mevzumızğa ait fotoresimler, magnit tasmasına yahut ğayrı usulda yazılı sesler olsa ve olarle paylaşmaq isteseñiz, bizge yazıñız, yollañız. Bizler, sizde saqlanılıp qalğan eski fotoresimlerni ya da dedeleriñiz, qartanalarıñız tarafından yırlanılğan türkülerni, olar tariflegen, keçmiş ile bağlı vaqialarnı, adiselerni, meraqlı ikâyelerni, bir sözle söylegende halq hazinesini saytımızğa yerleştirip barmaq niyetindemiz. Sizler bizge qırım, rus, ingliz ve türkiy halqlarnıñ tillerinde yaza bilesiñiz.

Bizler, saytımız hususta siziñ fikirleriñizni, teklifleriñizni, istekleriñizni diñlemege – eşitmege – faydalanmağa ve çaresi olduqça seslenmege er vaqıt azırmız.

Bizim saytımıznıñ qıymetli mühlisleri, sizlerden yañılıqlar ve mektüpler bekleymiz!