Софрада мубарек йымшакъ акъ отьмек,

Ашасам, о оськен топракъны анъам.

Топракъсыз яшавны тасавур этмек,

Ич мумкюн дегиль, деп мен ойгъа далам…

Топракътан алына бинъ тюрлю нимет,

О халкънынъ байлыгъы, энъ азиз мулькю.

Сен манълай тер тёксенъ, о санъа эльбет,

Бахт берир, багъышлар шевкъ, оюн, кулькю.

Суварып, сюрип, темизлеп, тырнап,

Кубрелеп, чёплеп тикенни, ташны.

Тер тёкюп ишлеймиз, кейфини арап,

О бере бизлерге сувны ве ашны.

Бир авуч топракъны бир алтын десенъ,

Янълыш! О сатылмаз. Ёкъ онъа фият!

Дюньяда алтынсыз яшап кунь корьсенъ,

Лякин айт, олурмы топракъсыз аят!..