Sofrada mubarek yımşaq aq ötmek,

Aşasam, o ösken topraqnı añam.

Topraqsız yaşavnı tasavur etmek,

İç mümkün degil, dep men oyğa dalam…

Topraqtan alına biñ türlü nimet,

O halqnıñ baylığı, eñ aziz mülkü.

Sen mañlay ter tökseñ, o saña elbet,

Baht berir, bağışlar şevq, oyun, külkü.

Suvarıp, sürip, temizlep, tırnap,

Kübrelep, çöplep tikenni, taşnı.

Ter töküp işleymiz, keyfini arap,

O bere bizlerge suvnı ve aşnı.

Bir avuç topraqnı bir altın deseñ,

Yañlış! O satılmaz. Yoq oña fiyat!

Dünyada altınsız yaşap kün körseñ,

Lâkin ayt, olurmı topraqsız ayat!..