Бора* Гъазы Герай 1501 сенеси догъду. О Къырым девлети тахтында 1588 сенеден та 1607 сенесине къадар булунып, мемлекетни идаре этти, яъни падишалыкъ япты. Бора Гъазы Герайнынъ падишалыгъы девиринде, Къырым девлети эм икътисадий джеэттен, эм ичтимаий-сиясий джеэттен баягъы илериледи. Мемлекетнинъ арбий къуветлери – силясы исляат япылды. Атеш ачкъан силя иле силялангъан махсус орду мейдангъа кетирильди. Нетиджеде, о эм авропа ёнелишинде, эм де асия ёнелишиндеки арбий сеферлеринининъ эксериетинде мисли ёкъ арбий гъалебелерни эльде этти. Бундан гъайры о, Къырым девлети тахтына минюв меселесинде де адалетли исляатларны амельге кечирди. Юксек бильгиге малик олгъан Бора Гъазы Герай Хан мешур сераскер эм де девлет эрбабы олмакъ иле берабер арап, фарс, тюрк ве мытлакъа догъмуш къырым тилини мукеммель бильген ве шу тиллерде сербест шиир яраткъан озь девирининъ буюк интеллектидир.

Бу юксек мертебели зат, айны заманда музыканы чокъ гузель анълагъан ве тюрлю чалгъы алетлерде, бу джумледен сазда да чала бильген истидат саиби эди. Бора Гъазы Герай аджайип хаттат олмакъ иле берабер мешур шаир эди. О озюнинъ Гъазаий намындаки эдебий тахаллюсиле, дюнья юзюне чыкъаргъан шиирлеринде – назм сатырларында бу фани дюньянынъ муреккеп ве айны заманда гъает меракълы, атта нешьэли тарафларыны ургъулай, терен фельсефий мана ташыгъан ильхам инджилериле безете.

Бора Гъазы Герай Хан – Гъазаий 1607 сенеси вефат этти. О къадимий Багъчасарай шеэрининъ Хансарай Дюрбесинде бабасы Девлет Герай Ханнынъ янында дефн олунды. Алланынъ рахметинде олсунлар.

____________________

*Бора (боран) – базы бир менбаларгъа коре озюнинъ джошкъун, ташкъын, дешетли табиаты ичюн Бора Гъазы Герай Хангъа халкъ тарафындан иште, Бора (Боран) намы берильди.