Яратаным, Аллахым!

Докъсан докъуз исминъ бар,

я Раббим!

Къырымларгъа истеклерини –

Бер юртунда девлетлерини.

Сенден гъайры ёкъ кимсемиз,

Ветан ичюн Дува этемиз.

Имдат беклей

къырым уммети,

Раим эйле,

ачсын къысмети.

Бизни Къырымда яраттынъ,

Ярдымынъ иле

сюргюнден къайттыкъ,

Энди халкъымыз

Къырымында

Девлетли олсун Ветанында.

Биз ичюн азиз Къырымымыз,

Тек мында ачсын бахтымыз.

Сенден гъайры

ёкъ анълайджакъ,

Яратаным,

ач бизге къучакъ!

Къырымларгъа

элинъни узат,

Ярдым бер, я Раббим

бер бизге имдат,

Бу азиз топракъ эдждадым ери,

Къырымларнынъ тюкенмез йыры.

Ада бизлерни

Ветанымызгъа,

Саип олайыкъ

Къырымымызгъа!

Къырымлар къальби

тек санъа эмин,

Эдждадлар ерини багъышла!

Амин!

Чатырдагънынъ о тарафы –

Денъиз далгъасы,

Не аджайип сув чаршафы,

Ялы якъасы.

Денъиз къушу – чагъалалар

Уча, дёнелер,

Сувдан балыкъ авланалар,

Ашкъа конелер.

Не гузельсинъ, догъмуш денъиз,

Зумрют козьлюсинъ,

Пек севемиз, эйбетлеймиз,

Далгъа сёзлюсинъ.

Сорадынъмы бизлер акъта

Эр кунь сабадан,

Сорадынъмы корьмек истеп

Бизни танълардан?..

Биз де санъа асрет эдик,

Сен буны сездинъ,

Далгъаларынъ тюшке кельди,

Чюнки беклединъ.