Yaratanım, Allahım!

Doqsan doquz ismiñ bar,

ya Rabbim!

Qırımlarğa isteklerini –

Ber yurtunda devletlerini.

Senden ğayrı yoq kimsemiz,

Vetan içün Duva etemiz.

İmdat bekley

qırım ümmeti,

Raim eyle,

açsın qısmeti.

Bizni Qırımda yarattıñ,

Yardımıñ ile

sürgünden qayttıq,

Endi halqımız

Qırımında

Devletli olsun Vetanında.

Biz içün aziz Qırımımız,

Tek mında açsın bahtımız.

Senden ğayrı

yoq añlaycaq,

Yaratanım,

aç bizge quçaq!

Qırımlarğa

eliñni uzat,

Yardım ber, ya Rabbim

ber bizge imdat,

Bu aziz topraq ecdadım yeri,

Qırımlarnıñ tükenmez yırı.

Ada bizlerni

Vetanımızğa,

Saip olayıq

Qırımımızğa!

Qırımlar qalbi

tek saña emin,

Ecdadlar yerini bağışla!

Amin!

Çatırdağnıñ o tarafı –

Deñiz dalğası,

Ne acayip suv çarşafı,

Yalı yaqası.

Deñiz quşu – çağalalar

Uça, döneler,

Suvdan balıq avlanalar,

Aşqa köneler.

Ne güzelsiñ, doğmuş deñiz,

Zumrüt közlüsiñ,

Pek sevemiz, eybetleymiz,

Dalğa sözlüsiñ.

Soradıñmı bizler aqta

Er kün sabadan,

Soradıñmı körmek istep

Bizni tañlardan?..

Biz de saña asret edik,

Sen bunı sezdiñ,

Dalğalarıñ tüşke keldi,

Çünki beklediñ.