Бен ашыкъым дею лаф этме, бульбуль,

Айран ве тааджип олдыгъынъ вармы?

Наз этип ачылмаз дерсинъ гондже гуль,

Ич кимгедир севда олдыгъынъ вармы?

Гедже-куньдюз ах чекип джан-гонъульден,

Асретинъле козь яшым ашты сельден.

Бир Юсуф* юзлюни алдырып эльден,

Якъуп** киби ич агъладыгъынъ вармы?

Сенинъ тамамиле бойнынъ сельби дал,

Бир бакъсанъ, такъдире эдер юз бинъ ал.

Бу алчакъкъа эп къул олмакъ не зевал,

Даим ернен ексан олдыгъынъ вармы?

Джевхерий дер, бе эй, севда бульбулим,

Бу алетлер бизде мевджут, ах гулюм.

Бен киби ашыкъы русвай эйлединъ,

Диль киби дурулмаз олдыгъынъ вармы?

Дели гонъуль, ене недир ферьядынъ?

Дердинъ ашкъ йырына уйдыр саз иле.

Джефалар чекмек олдымы адетинъ,

Ким ачты санъа сырыны наз иле?

Ничюн юзь дёндирдинъ, севдигим, бизден?

Я кемликми корьдинъ бу ашкъ-дердимден?

Билляий, Султаным, эль чекмем сенден,

Сен истерсенъ банъа юз бинъ наз иле.

Усандым чекмектен ярынъ джефасын,

Асыл сюремедим зевкъ-у сефасын.

Джевхерий, булурсынъ ярынъ вефасын,

Тездже ялварып корь чокъ нияз иле.

Эля козьлеринъи севдигим дильбер,

Косьтер, ай юзюнъи корьмеге кельдим.

Шефталинъи*** дерде дерман дедилер,

Керчекми, севдигим, сормагъа**** кельдим.

Куньдюз хаялларым, гедже тюшлерим,

Уяндыкъча агъламагъа башларым.

Севдигим, устюнъде учан къушларынъ

Тутып къанатларын къырмагъа кельдим.

Сенинъ ашыкъларынъ агълар дедилер,

Агълайып, яшыны сильмез дедилер.

Сени бир кез саран ольмез дедилер,

Керчекми, севгилим, сормагъа кельдим.

Сенинъ ишинъ еюп-ичмек дедилер,

Ёлдаш иле къонып-кочмек дедилер.

Коксюнъ дженнет, къойнунъ дженнет дедилер,

Акъ насип эдерсе, корьмеге кельдим.

Маиль олдым сенинъ индже белинъе,

Джаным къурбан олсын татлы тилинъе.

Ашыкъ олып сенинъ дульбер багъынъа,

Къырмызы гуллерни дермеге кельдим.

Дили севда дер ки гонъуль огърусы,

Кокте мелек, ерде хума***** яврусы.

Сёйлейим Бен санъа сёзюнъ догърусын,

Союнып къойнунъа кирмеге кельдим.

Дедим: - Дильбер, сарылалым.

Деди: - Ольдиририм, кельме.

Дедим: - Ольдир, бе эй, залым.

Деди: - Вар джан чекиш, ольме.

Дедим: - Не бу вефасызлыкъ?

Деди: - Бенде не ашналыкъ?

Дедим: - Бе бу эшкъиялыкъ?

Деди: - Вар гит, чокъ ачылма.

Дедим: - Гуллер киби дерсем.

Деди: - Корип элинъ къырсам.

Дедим: - Къойнунъа кирсем.

Деди: - Ич кирмеге ирме.

Дедим: - Гузель олан къачмаз.

Деди: - Ашыкъ сырын ачмаз.

Дедим: - Сув берейим ичмез.

Деди: - Кель ахымы алма.

Дедим: - Джевхерийим, кельдим.

Деди: - Хаберинъни алдым.

Дедим: - Санъа ашыкъ олдым.

Деди: - Вар гит сагълыкъ иле.

Дедим: - Дильбер, юзюнъни эйле аян.

Деди: - Ашыкъмысынъ, я не сорарсынъ?

Дедим: - Зилифлеринъ олмыш перишан.

Деди: - Олмыш исе сенми тарарсынъ?

Дедим: - Джана етер, чектим иджранынъ.

Деди: - Ич коксюнъде ёкъмы иманынъ?

Дедим: - Эллер сарар индже миянынъ*.

Деди: - Элем чекме, сен де сарарсынъ.

Дедим: - Лебинъ шекермидир, балмыдыр?

Деди: - Банъа этеджегинъ алмыдыр?

Дедим: - Бенден гъайры соргъан вармыдыр?

Деди: - Вармы, ёкъмы – сонъра дуярсынъ.

Дедим: - Ашкъ иле янды бу джан-у тен.

Деди: - Санъа къавушып этерим шенъ.

Дедим: - Джевхерийге садыкъ дегильсинъ.

Деди: - Беним киби чокъ арарсынъ сен.

Беяз коксюнъ банъа къаршы

Ачма, бени ольдирирсинъ.

Эля козьлер сюзе-сюзе

Бакъма, бени ольдирирсинъ.

Ольдирип къаныма кирме,

Эр корьгенге гонъуль верме.

Эля козьге сия сурьме

Чекме, бени ольдирирсинъ.

Джевхерий дер шах-и бульбуль,

Беяз гердан санки сумбуль.

Янагъынъа къырмызы гуль

Такъма, бени ольдирирсинъ.