Ирадели йигит-къызлар эллеринде

Тамгъалы кок байрагъымыз далгъалансын.

Кийик-вахший къанунларгъа къаршы, саде,

Арекетте, эльден тюшип хорланмасын.

Яш несиллер къорчаласын боран-ельден,

Юксек магърур къаялардай эбедиен,

Арслан халкъым акъсызлыкъкъа ёл бермесин,

Байрагъымыз ельге къаршы ельпиресин!

Алтын тюслю таракъ тамгъа белли эте,

Джеми халкъкъа бирдемликни, барышыкъны!

Тынч яшагъан мемлекетлер огде кете,

Сербест халкълар макъсадына тез-тез ете.

Барлыгъымыз, темсилимиз байрагъымыз,

Курешлерде далгъаланыр,тюшюрмемиз.

Догъру ёлдан тайпынмамыз, саф кетермиз,

Келир заман, акъсызлыкъны ёкъ этермиз.