Тынмай иджат этип, джошкъан,

Чокъ фенлерге иссе къошкъан,

Къаранлыкъкъа нурлар сачкъан,

Аджизлернинъ козюн ачкъан

Лукъман экимлер бизде бар.

Герайлар Тахты – Сарай бар.

Алим киби «айдамакълар»,

Султан киби къараманлар,

Ана-Юрткъа садыкъ эрлер,

«Халкъым!» деп, шеит кеткенлер,

Ветан ичюн озюн якъкъан

Федаийлер бизде олгъан.

Бал чокъракъкъа ташлар аткъан,

Азыр ашкъа зеэр къаткъан,

Валидесин эвден къувгъан,

Куньджюликтен азып-тозып,

Къомшусына мезар къазгъан

Алчакъ къузгъунлар бизде бар.

Заман Чархына не олгъан?

Тыш джерьянгъа меиль берген,

Урф-адетни инкяр эткен

Яп-яш чагълы «чотсакъаллар»

Ана-Юртта – арамызда

«Джат къабиле» пейда олгъан!

Бузкъыраннынъ баш йылдызы

Бузлу ильде къалгъан изи,

Къырджыман Рамазан-пельван

Шишман Поддубныйны йыкъкъан.

Тарихлерде дестан олгъан

Къадын-къызлар бизде олгъан.

Ферхаддайын, дагъны талкъан

Этип, халкъкъа «Чокъракъ» къазгъан,

Озь адын ташкъа язгъан бар.

Оксюзлернинъ сыйпап башын,

Софрасына къойып ашын

Аталыкъкъа алгъанлар бар.

Бу Азиз Юртта талашманъ,

«Къырым бизим» деп, адашманъ –

Эр Улькенинъ саиби бар,

Кокни опькен Чатырдагъ бар,

Эки денъиз къучагъында

КЪЫРЫМЛЫНЫНЪ МЕКЯНЫ БАР!