Майыс айында яс тутты Къырым,

Мавы кокни чакъты бир йылдырым.

Тамчы-тамчы козьяшлар тёкюльди,

Ана-Юрдундан миллет сюрюльди.

Чёлю, дагълары, къыр, ялы бою,

Эви, азбары, мал-мулькю, кою,

Эписи, тувгъаны, къалды еринде,

Кельген-кечкен авджылар элинде.

Къырым къанындан ташты неэрлер,

Сыра-сыра тизильди къабирлер.

О майыстан сонъ кечти чокъ айлар,

Куреш ёлуны сечти акъайлар.

Къор астындан баш котерди миллет,

Къартлардан яшларгъа бир васиет:

«Бизни алып барынъ Ана-Ерге,

О Ер асабалыкътыр сизлерге»…

Бугунь янъыдан джанлана Дияр,

Юкъудан уяна Эвлиялар.

Бай-Къиятта, Сувдагъта Башташлар,

Къайтадан тиклене, эй, юртдашлар.

Барсын, къурулсын Джами, мектеплер,

Барсын, бирлешсин миллет, мезхеплер,

Майыс айында гулленсин ювшан,

Къырымлыкъ Къырымгъа кетирсин Шан!