Mayıs ayında yas tuttı Qırım,

Mavı kökni çaqtı bir yıldırım.

Tamçı-tamçı közyaşlar töküldi,

Ana-Yurdundan millet sürüldi.

Çölü, dağları, qır, yalı boyu,

Evi, azbarı, mal-mülkü, köyü,

Episi, tuvğanı, qaldı yerinde,

Kelgen-keçken avcılar elinde.

Qırım qanından taştı neerler,

Sıra-sıra tizildi qabirler.

O mayıstan soñ keçti çoq aylar,

Küreş yolunı seçti aqaylar.

Qor astından baş köterdi millet,

Qartlardan yaşlarğa bir vasiyet:

"Bizni alıp barıñ Ana-Yerge,

O Yer asabalıqtır sizlerge"…

Bugün yañıdan canlana Diyar,

Yuqudan uyana Evliyalar.

Bay-Qiyatta, Suvdağta Baştaşlar,

Qaytadan tiklene, ey, yurtdaşlar.

Barsın, qurulsın Cami, mektepler,

Barsın, birleşsin millet, mezhepler,

Mayıs ayında güllensin yuvşan,

Qırımlıq Qırımğa ketirsin Şan!