Реян Али (Акъюз) Ташкент шеэринде (Озьбекстан) догъду,1988 сенеси. Сергей Есенин адына 281 санлы Ташкент шеэри орта мектебининъ биринджи сыныфына барды, 1995 сенеси. Он биринджи сыныфны исе, 14 санлы Химки гимназиясында (Москва) битирди. Мектепте ве гимназияда окъув иле бир сырада о, музыка мектеплеринде – фортепиано сыныфларында да тасиль алды.

Реян ханым ильк санъат инджеликлерини – сырларыны Ташкент ве Химки Балалар Музыка мектеплеринде менимседи. Бундан сонъ о Москва шеэри Музыка колледжинде (2005 – 2007), П.И. Чайковский адына Акъмесджид (Къырым) Музыка окъув юрдунда (2007 – 2010), Джумхуриет Алий окъув юрду «Къырым Гуманитар университетинде» (Ялта) (2010 – 2013), В.И. Вернадский адына Къырым Федераль университети къашындаки Гуманитар-педагогика академияда (2013 – 2015) «Музыка чалгъы алетлери санъаты» болюклерини окъуп битирди. Реян ханым Гуманитар-педагогика академияны Къырмызы Диплом иле екюнледи. Нетиджеде, генч санъаткяр Реян Али (Акъюз) фортепиано боюнджа юксек севиели мутехассыс олуп етишти. О бугунь де-бугунь Истанбул шеэринде (Тюркие) яшап кенди иджидий фаалиетини эп девам этмекте.

Реян ханымгъа муджизевий санъат алеминде ве айны заманда дюльбер аилевий яшайышында янъы-янъы уфукъларны – мувафакъиетлерни эльде этмесине дуаджымыз! Алла эр вакъыт ве эр ерде Реян ханыма ве къорантасына ярдымджы олсун! Амин.

Келинъиз, энди генч санъаткярнынъ махсулатларындан, мейваларындан бири – фортепианода иджра эткен «Хайтарма-макъам» серлевалы музыкасыны динълейик.