Ryeyan Ali (Aqyuz) Taşkent şeerinde (Özbekstan) doğdu,1988 senesi. Sergey Yesenin adına 281 sanlı Taşkent şeeri orta mektebiniñ birinci sınıfına bardı, 1995 senesi. On birinci sınıfnı ise, 14 sanlı Himki gimnaziyasında (Moskva) bitirdi. Mektepte ve gimnaziyada oquv ile bir sırada o, muzıka mekteplerinde – fortepiano sınıflarında da tasil aldı.

Reyan hanım ilk sañat inceliklerini – sırlarını Taşkent ve Himki Balalar Muzıka mekteplerinde menimsedi. Bundan soñ o Moskva şeeri Muzıka köllecinde (2005 – 2007), P.İ. Çaykovskiy adına Aqmescid (Qırım) Muzıka oquv yurdunda (2007 – 2010), Cumhuriyet Aliy oquv yurdu "Qırım Gumanitar universitetinde" (Yalta) (2010 – 2013), V.İ. Vernadskiy adına Qırım Federal universiteti qaşındaki Gumanitar-pedagogika akademiyada (2013 – 2015) "Muzıka çalğı aletleri sañatı" bölüklerini oqup bitirdi. Reyan hanım Gumanitar-pedagogika akademiyanı Qırmızı Diplom ile yekünledi. Neticede, genç sañatkâr Reyan Ali (Aqyuz) fortepiano boyunca yüksek seviyeli mütehassıs olup yetişti. O bugün de-bugün İstanbul şeerinde (Türkiye) yaşap kendi icidiy faaliyetini ep devam etmekte.

Reyan hanımğa mücizeviy sañat aleminde ve aynı zamanda dülber aileviy yaşayışında yañı-yañı ufuqlarnı – muvafaqiyetlerni elde etmesine duacımız! Alla er vaqıt ve er yerde Reyan hanıma ve qorantasına yardımcı olsun! Amin.

Keliñiz, endi genç sañatkârnıñ mahsulatlarından, meyvalarından biri – fortepianoda icra etken "Haytarma-maqam" serlevalı muzıkasını diñleyik.