Абдулла Рамиз Паша Къырымда 1765 сенеси догъду. Тасильни эм догъмуш Ветанында, эм де Тюркиеде алды. О юксек девлет вазифелеринде, бу джумледен махкеме – адлие идарелеринде хызмет этти. Бу, гъает буюк бильгили къырым эвляды, Османлы Императорлыгъы огюнде косьтерген хызметлери – ярарлыкълары ичюн, «Паша» девлет унванына наиль олду. Абдулла Рамиз Паша базы бир менбаларгъа коре, XIX-нджы юзйыллыкънынъ башларында, даа догърусы 1813 сенеси душманлары элинден эляк ола.

Абдулла Рамиз Пашанынъ огълу Иззет Эфенди, озюнинъ «Харита-йы Къапуданан-и Дерья» серлевалы тарихий эсеринде, бабасы акъкъында толу, тавсиятлы, меракълы малюматлар бере.

Эбет, Абдулла Рамиз Паша да, озюнинъ бир сыра къырымлы ветандашлары киби, эдебият иле огърашты. Шахсий фикирлерини, дуйгъуларыны кягъыткъа – шиирий сатырларгъа тёктю.

Абдулла Рамиз Пашанынъ иджадындан нумюнелер, илькиде 1846 сенеси Тюркиеде дюнья юзюни корьди.