Abdulla Ramiz Paşa Qırımda 1765 senesi doğdu. Tasilni em doğmuş Vetanında, em de Türkiyede aldı. O yüksek devlet vazifelerinde, bu cümleden mahkeme – adliye idarelerinde hızmet etti. Bu, ğayet büyük bilgili qırım evlâdı, Osmanlı İmperatorlığı ögünde köstergen hızmetleri – yararlıqları içün, "Paşa" devlet unvanına nail oldu. Abdulla Ramiz Paşa bazı bir menbalarğa köre, XIX-ncı yüzyıllıqnıñ başlarında, daa doğrusı 1813 senesi duşmanları elinden elâk ola.

Abdulla Ramiz Paşanıñ oğlu İzzet Efendi, özüniñ "Harita-yı Qapudanan-i Derya" serlevalı tarihiy eserinde, babası aqqında tolu, tavsiyatlı, meraqlı malümatlar bere.

Ebet, Abdulla Ramiz Paşa da, özüniñ bir sıra qırımlı vetandaşları kibi, edebiyat ile oğraştı. Şahsiy fikirlerini, duyğularını kâğıtqa – şiiriy satırlarğa töktü.

Abdulla Ramiz Paşanıñ icadından nümüneler, ilkide 1846 senesi Türkiyede dünya yüzüni kördi.