Selâm aleyküm, ürmetli "Vetanımnıñ hoş aenki" internet saytı!

Men Arzı–Bahar Aliyeva 1985 senesi Taşkent şeerinde doğdum. Menim birinci – Arzı adımnı Qırım Milliy Areketiniñ başında turğan şahslardan – babamnıñ dayı-babası, menim ise, dayı-dedem rahmetli Muarrem Martınov Ezan çağırıp qoydı. Ekinci – Bahar adımnı ise, menim biraz keyfim qaçuvı sebebi, endi mında, Qırımda ruhaniy şahslardan Mustafa efendi kene Ezan çağırıp qoydı.

Deycegim, men mektepni bitirgen soñ Mihail Lomonosov adını taşığan MGU auditoriyalarında oturıp bilgi almaq istedim. Amma mandat komissiyasından keçmedim. Lâkin MGUda alğan ballarnen – ballnen Mihail Şolohov adına pedagogika universitetine qabul olundım. Neticede men Mihail Şolohov adına Moskva universitetniñ ecnebiy tilleri, soñra Qırımda Vernandskiy adına Tavriya milliy universitetiniñ çetel bölüklerinde tasil aldım. İngliz, nemse, arap tillerinden mütehassısım. Mektepte ve balalar bağçasında ingliz tilinden dersler alıp bardım. Şimdi de balalarnen çalışam.

Men kemanede çalmağa, yırlamağa sevem, tercimeler yapam. Soñki vaqıtlarda belli ingliz edibi Rut Eynsvortnıñ "Quvurçıq Rafti", Ağa-Qardaş Grimmniñ "Şahzade-baqa", ingliz halq masallarından "Dig Vittington ve onıñ mışığı" serlevalı eserlerni ana tiline – qırım tiline çevirip "Armançıq" balalar mecmuasınıñ 2017 – 2020 seneleri çıqqan sanlarında derc ettim. Bazı da, çeşit yarışlarda iştirak etip ğalebe qazanam. Meselâ, Yalta şeerinde ötkerilgen "Yaşasın, istidat!" Halqara Konkurs-Festivalde "Halq vokalı" nominatsiyasında ekinci yerni qazandım (2017 s.) , Aluşta şeerinde ötkerilgen 3-ci Halqara Festival-Konkursında "Estrada vokal, solist" nominatsiyasında 3-nci Derece laureatı oldum (2018 s.), Quran oquv yarışında iştirak etip, Qırım Musulmanları Diniy idaresiniñ "Hayrunnisa" Yarlığını elde ettim (2019 s.) ve ilâhre, ve ilâhre. 2019 senesi Aqmescitte İsmail Müfti–Zade fondu tarafından İsmail Gaspralı hatırasına bağışlanğan "Genç terciman" yarışında O. Genriniñ "Soñki yapraq" ikâyesinen iştirak ettim. Amma U.Edemova reisligi altındaki jüri menim işimni keçirmedi. Jüriniñ aytqanına köre, ingliz tilinden mütehassıs tapılmağan ve bu sebepten de, men iştirak etken nominatsiya lâğu etilgen. Nasıl da olsa, olar menim qoluma "Genç terciman" Sertifikatını tuttırdılar.

Ürmetli "Vetanımnıñ hoş aenki" internet saytı, men siziñ sayğılı oquyıcılarıñızğa meşur amerika yazıcısı O. Genriniñ (1862 –1910) "Soñki yapraq" ("The Last Leaf") serlevalı ikâyesini bağışlamaq isteyim.

Er ihtimalğa qarşı, menim adaşlarım-familiyadaşlarım çoq olğanı sebep, özümniñ fotoresimimni de qoşıp yollayım. Sağ oluñız!

Sıcaq selâmnen,