Rustem Ali… Bu zatı aliylerniñ ismini añğanda, Qırımnıñ qaramanane ve qorqubilmez evlâtları ile bir sırada bu aziz topraqnıñ tılsımlı çölleri, tekrarlanmaz manzaralı dağları, qayaları, dereleri, qobaları, bağ-bağçaları, deñizleri, sırlı kökü, parıldağan yıldızları… bir sözle söylegende, yarımadanıñ cemi variyeti bir kereden közleriñ ögünde canlana. Sebebi, sağlam iri müçeli, arslan yürekli, aqiqatta Enver Selâmetniñ Prometeyini añdırğan Suvdağ qartalı Rustem Ali özüniñ bol, cümert qalbi ile bularnıñ episini kendi bağrına qavrap ala.

Rustem Ali mına endi aman-aman çerik asırdan berli, yorulmaq nedir bilmeden, doğmuş Qırımı aşqına çalışaraq cümert qalemini işletip, acayip vetan evlâtlarınıñ qalblerine elâllıq, merhamet, muabbetlik duyğu ışığını "aşlap" kelmekte. Alla qısmet etse, mıtlaqa öyle vaqıt-saatı kelir, er bir qırımlınıñ qalbinde tutaştırılğan Rustem Aliniñ ışıqları biri-birile qoşulır – birleşir ve büyük bir Alevge çevirilir. Bu qudretli qırım Alevi – Meşali deñiz feneri kibi, dülber seyyaremizniñ er bir köşesinden seçilir ve aynı zamanda onıñ nurundan ğıda alınıp barılır. Ğayet qocaman qalb saibi Rustem Ali buña yüz defa-biñ defa emin. Eger de, o buña azaçıq bile şübelense edi, onıñ çoq zengin icadiy yaratıcılığı bir tarafta tursın, o bu fani dünyanı endi çoqtan terk etip keter edi. Bu da aqiqat!

Şair, nesirci, publitsist, tenqidçi, edebiyatşnas, jurnalist, felsefeci – ikmetli subetdeş Rustem Aliniñ pişkin qalemi astından çıqqan yazıları – eserleri ile tanış olğan er bir insan, daa demiçik yuqarıda söylenilgen fikirlerni bütün barlığı ile añlar, duyar, sezer, atta köre bilir…

Aydıñız, endi beraber bu cümert qırımlınıñ tercimeialı ile qısqadan tanış olayıq.

Rustem Ali cenapları dülber Qırımnıñ qadimiy ve aynı zamanda daima genç Suvdağ (Sudak) şeerinde doğdı, 1936 senesi, dekabr 26-da. O, 7 – 8 yaşlarında olğan çağında, 1944 senesi kommunistler rejimi tarafından cezağa (repressiyağa) oğratıldı. Rustemçik anası Esma apte ile beraber doğmuş beşigi Qırımdan biñlerle kilometr avlaqqa – sovetler imperiyasınıñ kenar bir köşesine, daa doğrusı Andican velâyetine (Özbekstan) kötürilip taşlandılar. Canavar sovet akimiyeti tarafından beftan cezalanğan qırım oğlançığı ğurbetlikte defalarca ölip, tam manada, kene tirildi. Atta bir defa ölüler odasına da, (morg)ğa, tüşti, ama ömüri bitmegen eken, o tekrar ayatqa qayttı…

Söylemek istegenimiz, Allanıñ ikmetile, Rustem Ali özüniñ yüzlerle, biñlerle qırımlı aqrandaşları kibi, canavrlar doğurğan bütün afatlarnı yeñdi. O şu canavar akimiyetke qarşı amansız küreş alıp bardı, belli bir derecede ğudubet (monstr) üzerinden ğalebe de qazana bildi.

"Burulışta" ve "Er qabaat mendedir" romanlarnıñ, "Selbiler ebediy yaşaylar" povestlerde romannıñ, ikâyelerniñ, publikatsiyalarnıñ, teren felsefe ile suvarılğan nazm eserlerniñ müellifi Rustem Ali, mına endi yigirmi yıldan ziyade vaqıt zarfında, özüniñ doğğan şeerinde ana tilde "Suvdağ sesi" gazetasını çıqara, yani bu tarihiy gazetada baş muarrir vazifesinde faaliyet köstere. Bundan evel o, Taşkentte neşir etilgen "Lenin bayrağı" gazetasında "Edebiyat ve sañat" boyuginde müdirlik yaptı.

"ELÂLLIQ, MERHAMET, MUABBETLİK", "VETANIMIZ – QIRIM, MİLLETİMİZ - QIRIM, ANA TİLİMİZ QIRIM TİLİ. MİLLETİM YAŞASIN, DESEÑ, ANA TİLİÑNİ ÖGREN", "BUGÜN BALASINEN ANA TİLİNDE LAFETKEN YAŞ ANA OLMASA, YARIN MİLLET YOQTUR!" "TÜRKLERİN KENDİLERİNİ TATAR OLARAQ TANITMALARI YAÑLIŞTIR, TATAR KELİMESİ BİR MİLLETNİÑ ADI DEGİLDİR, RUSİYEDE BULUNĞAN TÜRKLERE İSNAD EDİLMİŞ BİR SIFATTIR" İsmail bey GASPRALI" kibi şiarlar astında neşir etilgen "Suvdağ sesi" gazetasınıñ mündericesile diqqatle tanış olup barğan er bir oquyıcı, mezkür gazeta yalıñız suvdağnıñ sesi degil de, o bütün Qırımnıñ, daa doğrusı o bir tamam bütün türk dünyasınıñ SESİ olğanına eminlik besleysiñ. Albu ise, Suvdağ Prometeyi – Rustem Aliniñ qalbinden dağılğan ışıqlar kettikçe büyük Alevge – ilâiy bir Meşalge çevirilecegine işanç doğura.

P.S. Rustem Ali 2020 senesi, noyabr 8-de, 86 yaşında vefat etti. Allanıñ rahmetinde olsun.