«Отелло», «Макбет», «Къырал Лир», «Ромео ве Джульетта»… киби эбедиеттен ер алгъан эсерлернинъ муэллифи Уильям Шекспирнинъ: «Дюньягъа кельген эр бир шаир кенди къалемини илькиде аджайип севги козьяшына батыра!..» дегени киби, джумерт къальбли Ибраим Сейтабла да, озюнинъ иджадыны юрегинден янардагъ киби фышкъырып чыкъкъан къудретли ве айны заманда иляий севгиден башлады, яъни къалемини илькиде Ветаны Къырымгъа беслеген къудретли севги козьяшларына батырды. Иште бу иляий севги Ибраим Сейтаблагъа уджю-буджагъы корюльмеген ильхам дюньясына ёл косьтерди, онынъ муджизевий къапуларыны ачты. О, мезкюр къапудан ичериге атлады, дедиль адымлар атты. Бу адымлар саесинде сыра-сыра назм сатырлар догъду.

Онынъ юреги севгиден ойле толуп-таша ки, о, Ветан севгисинден, онынъ табиатындан, манзарасындан, эфсаневий кечмишинден… ойле сархошлана ки, атта базы шиирлеринде назмиет къаидесине биле риает этмеден бир тамам къальб козьяшларынынъ тесири алтында, онынъ къыршавында къалып кете.

дей шаирнинъ лирик къараманы.

Ибраим Сеитабла заты алийлери иште бойле севги тесиринде булунып, о эм ана къырым тилинде, эм де рус тилинде иджад эте. О озюнинъ «Дагъларнынъ сыры», «Къарлы Азиз-баба», «Таш-Аир чешмеси», «Айт, Юртум!», «Къырым къызлары», «Ана тилим», «Козьяш чешме», «Жемчужина земли», «Диалог с судьбой», «Законы гор», «Крым ниспослал нам Сам Творец», «Наша память», «Крымская осень», «Кто отнял все мечты мои?»… киби шиирлери иле къырым миллий эдебиятына озюне хас янъы бир эдебий-бедий ёнелиш иле кирип кельген шаирдир.

Ибраим Сейтабланынъ лирик къараманы Къырымнынъ чешит ерлеринде – кошелеринде булуна, Къырым бойлап сеяат япа… озюнинъ гъает къадимий Къырымстанынынъ бинълерле йыллар зарфында яшап кельген эфсанелерини тапып чыкъара, эфсанелерге янъыдан джан бере. О бундан къувана – кейф чата, озюни мезкюр эфсанелернинъ бир къысымы эсап эте…

Яхуд:

Затен, Ибраим Сейтабланынъ къалеми астындан чыкъкъан шиирлер халкъ тилине якъын олуп, эр кезге – яш-къарт окъуйыджынынъ къальбине барып токъуна. Окъуйыджы озюни назм сатырларда тасвирленильген лирик къараман иле берабер ис эте, онынъле берабер къувана, тарсыкъа, магърурлана ве иляре, ве иляхре…

«Ибраим эфендининъ шиирлери анълайышлы тильде язылгъан, енгиль окъула, оларда миллийлик ве самимийлик, терен дуйгъу ве терен фикирлер бар, – дей этнограф ве эдебиятшнас алим Хаджы Энвер Озенбашлы. Сонъ фикирини девам эте. – Ибраим Сейтаблагъа ана тилимизде тасиль алмагъа къысмет олмады, Лякин бабасы – фотисалалы Энвер Сейтабла огълу ве анасы – албатлы Пакизе Абкерим къызындан балалыкъта эшиткен масаллары, Къырым акъкъында икяелери, Сайде къартанасынынъ гузель сеснен, буюк усталыкънен иджра эткен къырым миллий халкъ тюркюлери онъа пек тесир эте ве ана тилимизге, эдебиятымызгъа, медениетимизге, Ветанымызгъа нисбетен терен севги ашлай, къолуна къалем алмагъа себеп ола…».

Энди бу фани дюньяны терк эткен миллетпервер, Ветанпервер, темиз-пак къальбли меним рахметли Энвер достумнынъ сёзлеринде акъикъат бар. Даа демичик юкъарыда сёйленилип кечильген фикирлер бунъа ачыкъ-айдын мисаль ола билир…

Къавий иманлы Ибраим Энвер Огълу Сейтабла 1950 сенеси январь 7-де сюргюнлик – джеза ерлеринде, яъни Къургъан-Тёпе веляетининъ (Таджикстан) Вахш районына бакъкъан Акъ-Гъазы (Киров) совхозында догъду. Орта мектепте, Душанбе (Сталинабад) шеэриндеки Таджикстан девлет университетинде тасиль алды. Аспирантурада окъуды. Диссертация къорчалады. Физика-математика илимлери намзети ильмий унванынаа наиль олду. Баягъы бир йыл зарфында бильги алгъан кенди университетинде фаалиет косьтерди…

Ибраим Сейтабла баба-деде юрдуна – догъмуш Къырымына 1992 сенеси къайтты. О бугунь де-бугунь Акъмесджид шеэринде яшай ве иджад эте.