Dyünya qurulğanda… işte o qadimiy devirdeki barlıqlarnıñ atta ayvanlarnıñ körünişi bile bugünkine nisbeten farqlı olğan.

Meselâ, Afrikada Hayveld degen qum reñkli sıcaq bir yerde Leopar yaşağan. O vaqıtları ayvanlarnıñ terisi de bugünki nesilinden çoq farq etken. Leopar qumlı sarı – boz tüste, Zebra aydın külreñte – açıq boz tüste, Zurafe aydın sarı – açıq sarı tüste olğanlar...

Zaten, Leopar yerde uzanıp yatqanda, onı körmekniñ abaylamaqnıñ çaresi yoq. Çünki onıñ qum reñkli sarı terisi yerdeki sarı topraq ile qoşulıp kete.

Leopar Zebra ve Zurafenen oyun yapmağa, olarğa qaşanmağa özüne adet etip aldı. Mına şimdi de, Leopar yatqan yerinde Zebra ve Zurafeniñ kelgenlerini bekley. Olar peyda olğanları kibi, Leopar apansızdan qarşılarına atılıp çiqtı. O, Zebra ve Zurafeni qorquzıp bir tamam ötlerini patlattı.

Böyle sekirüv, atıluv kibi oyunlardan Leoparnıñ oşuna ketti, quvandı, göñüli hoşlandı. Zebranen Zurafe ise, adeti üzre Leoparnıñ böyle oyunlarından quvanmadılar, bundan zevq almadılar. Aksine olar pek eyecanlandılar, azap çektiler.

Zebra ve Zurafe Leoparnıñ oyunğa berilip, biraz uzaqlaşuvından faydalanıp, olar Büşveld degen yerge çekildiler.

Büşveld yüksek tereklernen qapavlı orman. Küneş öz nurlarını orman üzerine saçıp, terekler aralıqlarına benekliyolaqlı kölgelerni bıraqa. Zebra ve Zurafe çoq vaqıtlarını mında keçirdiler. Neticede, benekli kölgeler olarnıñ terisindeki reñkni deniştirdi.

Zebra yolaqlı kölgeniñ tübüne sıqsıq kelip turdı ve biraz vaqıt keçken soñ, onıñ bütün vucudında esmeri yolaqlar asıl oldu. Zurafe de benekli kölgeniñ tübünde turdı ve birazdan onıñ da bütün vucudında esmeri benekler peyda oldu.

Böyleliknen, qısqa bir vaqıt içerisinde, ormanda bulunğan Zebra ve Zurafe de Hayvelde ki Leopar kibi gizlenmek çareleri oldu. Zebra ve Zurafenen yanânaşa turıp qalsañ bile, olarnı körüp olamazsıñ abaylamazsıñ.

Leoparımız ise, Zebra ve Zurafe dostlarını sıqsıq hatırlap, olarnı pek sağındı. Ahır soñu, o özüniñ Efiop dostunen qonuşıp, olar ne yerde ekenlerini sorap bilmek fikirine keldi.

O qadim zamanları adam zatından olğan Efiopnıñ da, teni qum tüste olğan. Efiop Zebra ve Zurafe ne yerde olğanları aqqında bilmese de, o Leoparğa olarnı qıdırıp tapmağa yardım etmek qararına keldi.

Sıcaq küneşli künlerden birinde Efiop Leoparnıñ dostlarını tapmaq maqsadı ile, beraberlikte Büşveld degen yerge kelip çiqtılar. Qum kibi sarı tüsteki Leopar ve Efiop benekli yarıq kölgeli ormanda biri digerinden farqlı körüne ediler.

- Men Zebranıñ qoqusını aldım, amma men onı iç bir yerde körüp olamayım, dedi Leopar.

- Men de, Zurafeniñ qoqusını aldım, lâkin men de onı körmeyim, dedi Efiop.

Aydı, oldı-olacaq, endi olarnı gecesi qıdırmaqnı devam eterik, dedi Leopar. – Böyle yapsaq, biz içün daa elverişli olur.

Olar şu gecesı dostlarını tapmaq içün ormannı kezip çiqtılar. Leopar Zebranı onıñ qoqusından duysa da, amma o şimdi yaqalağan yolaqlı ayvan Zebra dostuna aslı da beñzemey. Efiop da Zurafe meselesinde tamam böyle vaziyette. Ve niayet, biraz vaqıt daa keçerkeçmez, olar biribirinen tapıştılar.

Zebra ve Zurafe Leoparğa qum tüste terisi onı Hayvelde gizlegeni kibi olarnı da mında ormanda tenlerindeki beneklerölaqlar işte öyle saqladığını ayttılar.

Leopar ve Efiop Büşvelde qalıp yaşamaq isteseler, olar da Zebra ve Zurafe kibi kendi terileriniñ tüslerini deñiştermege mecbur olacaqlarını añladılar.

Efiop kölge tübünde qara balçıq – çamur taptı. Çamurnı kendi tenine sildi. Onıñ teni siyah qara reñkke boyalandı. İşte, Efiop o zamandan bugünece öyle siyah reñkte de qaldı.

- Va-a-y! – hitap etti Leopar. – Sen meni de boyalap olursıñmı? Amma men bir tamam siyah olmağa istemeyim. Men Zurafe kibi benekli olmaq isteyim.

Böyleliknen, Efiop kendi parmaqları ucunı işletip, Leoparın terisi üzerine çamurdan benekli lekeler yasadı.

O künden berli, Leopar terisinñ er yerinde benekli lekeler mevcut.