– Бир заманы, бир огъланчыкъ олгъан. О, коктеки йылдызларны пек севе экен. Огъланчыкъ эр гедже пенджересинден йылдызларны сейир эткен.

О озюнинъ шахсий бир йылдызы олгъаныны истеген.

Огъланчыкъ тюшлеринде йылдызнен достлашкъаныны корьген, бу акъта хаял сюрюп юрьген. О, йылдыз достунен берабер cакъланджакъ (игра в прятки) оюни ойнамакъ ве узакъ сеферлерлерде булунмакъ хусуста ойлангъан…

Лафнынъ къыскъасы, огъланчыкъ кенди тюшюнджелерини амельге кечирмек ичюн о, йылдызлардан бирисини тутмакъ къарарына кельди.

О озюнинъ арз эткен гъаесини омюрге кечирмек ичюн, саба маали энъ келишкен вакъыт деп тюшюнди. Огъланчыкънынъ фикирине коре, йылдызлар бутюн гедже кокте асылып турмакътан ёрулып, олар сабадан ерге тюшюп башлайджакълар.

Огъланчыкъ кенди макъсадына иришмек ичюн эртеси куню, танъ аткъанынен, ёлгъа чыкъты. Лякин о, кокте бир йылдыз биле корьмейип, ерге отурды ве йылдызларынъ пейда олмасыны беклеп башлады. Бекледи... бекледи... Уйле вакъыты кельди – уйле емегини ашады... Акъшам вакъыты кельди – акъшам емегини ашап бекледи... Акъшам емегини ашагъан сонъра, даа бираз бекледи...

Кунеш раатланмакъ ичюн энди къонмагъа азырлангъанда о ниает кокте бир йылдызчыкъны корьди. Огъланчыкъ секирип-секирип, оны тутмагъа тырышты. Лякин о, юксекке секирип оламады. Сонъра мукъайытлыкънен балабан бир терекнинъ тёпесине тырмашып чыкъы. Амма йылдыз пек юксекте олгъаны себеп, огъланчыкънынъ эли онъа етишип оламады.

Огъланчыкъ йылдызчыкъны бабасынынъ къайыгъындаки лассонен (къуртарыджы къушакъ) багъламакъ истеди. Лякин оны котерип чекмеге онъа пек агъыр кельди.

О озюнинъ космик гемисине (огъланчыкънынъ ракета оюнчагъы козьде тутула) отырып, йылдызына учып етмеге мумкюн оладжагъыны тюшюнди. Лякин, даа якъында – кечкен салы куню, о космик гемисинен айгъа барып кельгени себеп, ракетасында якъарлыкъ биткен эди.

Бельки йылдызына барып чыкъмагъа онъа чагъала ярдым этер? Теэссюф ки, онъа расткельген бир чагъала, аслыда ярдым этмек истемеди.

Огъланчыкъ окюнчнен йылдызыны ич бир вакъыт тутып оламайджагъыны тюшюнди. Иште, тамам бу арада о, сувда ялдагъан бир шейни абайлады. Эбет, бу шей огъланчыкънынъ омюрюнде расткельген энъ дюльбер йылдызлардан бириси эди. Эм озю де кичкене, аджайип йылдызчыкъ. О денъиз йылдызы олса да, бесе-белли коктен тюшкен... Огъланчыкъ эллерини йылдызчиккъа узатты, оны тутмакъ ве сувдан чыкъармакъ истеди. Лякин эллеринен онъа етишип оламады.

Онынъ башына, йылдыз денъизде ювунгъандан сонъ саильге чыкъмакъ мумкюн, деген фикир кельди. Огъланчикъ бойле тюшюндженен ялы тарафкъа чапты.

О, саильде йылдызчикъны бекледи. Андан мында, мындан анда юрип, оны къыдырды. Бираз даа бекледи… Ве, тесадюфен огъланчыкъ не корьсин, алтын къум устюнде бир йылдызчыкъ парылдай...

Бойлеликнен, огъланчикъ йылдызчыкъны тутты. Озюнынъ «шахсий йылдызыны».