Селям алейкум, урьметли «Ветанымнынъ хош аэнки» интернет сайты!

Мен Арзы–Баарь Алиева 1985 сенеси Ташкент шеэринде догъдум. Меним биринджи – Арзы адымны Къырым Миллий Арекетининъ башында тургъан шахслардан – бабамнынъ дайы-бабасы, меним исе, дайы-дедем рахметли Муаррем Мартынов Эзан чагъырып къойды. Экинджи – Баарь адымны исе, меним бираз кейфим къачувы себеби, энди мында, Къырымда руханий шахслардан Мустафа эфенди кене Эзан чагъырып къойды.

Дейджегим, мен мектепни битирген сонъ Михаил Ломоносов адыны ташыгъан МГУ аудиторияларында отурып бильги алмакъ истедим. Амма мандат комиссиясындан кечмедим. Лякин МГУда алгъан балларнен – баллнен Михаил Шолохов адына педагогика университетине къабул олундым. Нетиджеде мен Михаил Шолохов адына Москва университетнинъ эджнебий тиллери, сонъра Къырымда Вернандский адына Таврия миллий университетининъ четэль болюклеринде тасиль алдым. Инглиз, немсе, арап тиллеринден мутехассысым. Мектепте ве балалар багъчасында инглиз тилинден дерслер алып бардым. Шимди де балаларнен чалышам.

Мен кеманеде чалмагъа, йырламагъа севем, терджимелер япам. Сонъки вакъытларда белли инглиз эдиби Рут Эйнсвортнынъ «Къувурчыкъ Рафти», Агъа-Къардаш Гриммнинъ «Шахзаде-бакъа», инглиз халкъ масалларындан «Диг Виттингтон ве онынъ мышыгъы» серлевалы эсерлерни ана тилине – къырым тилине чевирип «Арманчыкъ» балалар меджмуасынынъ 2017 – 2020 сенелери чыкъкъан санларында дердж эттим. Базы да, чешит ярышларда иштирак этип гъалебе къазанам. Меселя, Ялта шеэринде отькерильген «Яшасын, истидат!» Халкъара Конкурс-Фестивальде «Халкъ вокалы» номинациясында экинджи ерни къазандым (2017 с.), Алушта шеэринде отькерильген 3-джи Халкъара Фестиваль-Конкурсында «Эстрада вокал, солист» номинациясында 3-нджи Дередже лауреаты олдум (2018 с.), Къуран окъув ярышында иштирак этип, Къырым Мусульманлары Диний идаресининъ «Хайрунниса» Ярлыгъыны элде эттим (2019 с.) ве иляхре, ве иляхре. 2019 сенеси Акъмесджитте Исмаил Муфти–Заде фонду тарафындан Исмаил Гаспралы хатырасына багъышлангъан «Генч терджиман» ярышында О. Генрининъ «Сонъки япракъ» икяесинен иштирак эттим. Амма У.Эдемова реислиги алтындаки жюри меним ишимни кечирмеди. Жюрининъ айткъанына коре, инглиз тилинден мутехассыс тапылмагъан ве бу себептен де, мен иштирак эткен номинация лягъу этильген. Насыл да олса, олар меним къолума «Генч терджиман» Сертификатыны туттырдылар.

Урьметли «Ветанымнынъ хош аэнки» интернет сайты, мен сизинъ сайгъылы окъуйыджыларынъызгъа мешур америка языджысы О. Генрининъ (1862 –1910) «Сонъки япракъ» («The Last Leaf») серлевалы икяесини багъышламакъ истейим.

Эр ихтималгъа къаршы, меним адашларым-фамилиядашларым чокъ олгъаны себеп, озюмнинъ фоторесимимни де къошып ёллайым. Сагъ олунъыз!

Сыджакъ селямнен,