Нариман Абдульваап Ташкентке якъын, Чырчыкъ шеэринде (Озьбекстан) догъды, 1954 сенеси декабрь 22-де. Абдульвааплар къорантасы 1975 сенеси коммунистлер низамынынъ (сиcтемининъ) япкъан, косьтерген мисли ёкъ маниаларына – зорбалыкъларына бакъмадан, олар кенди алтын Бешигине – Къырымгъа къайттылар. Нариман Абдульваап орта мектепни битирген сонъра Харьков шеэринде Петро Котляровский адына Санъат институтынынъ кемане чалгъы алети эм де Акъмесджид (Симферополь) девлет университетининъ (шимди Таврия миллий университети) къырымтатар ве рус филологиясы болюклеринде тасиль алды.

Бугунь де – бугунь Нариман Абдульваап Къырым муэндислик ве педагогика университетинде муаллим эм де къырым тили, эдебияты, тарихы ве медениети меркезинде уйкен ильмий хадим вазифелеринде фаалиет косьтермекте. Генч алим, бир сыра ильмий-амелий халкъара конференсияларда, симпозиумларда иштирак этерек, озюнинъ гъает меракълы – мундериджели ильмий ишлериле чыкъышлар япып кельмекте ве айны заманда о, илим-фен дюньясынынъ алгъышыны къазанмакъта.

Энди баягъы бир тарихий-этнография араштырмаларда (экспедицияларда) иштирак эткен Нариман Абдульваап «Бахчисарайская книжная коллекция в Российской национальной библиотеке» монографиясыны ве «Грёзы любви. Поэзия крымских ханов и поэтов их круга» серлевалы антология китапларыны неширден чыкъарды. Бундан гъайры о эдебият, сиясий-медений тарих, Ислям ве тасаввуф, санъат… мевзуларда «Къырымлы алим ве шейхлери (XIV – XIX асырлар)», «Шахин Герай ве къальп шеклиндеки гъазели», «Ашыкъ Умэрге даир Кезлевли Ибраим Тулевнинъ хатырлавлары» киби етмиштен зияде ильмий ишлернинъ – макъалелернинъ муэллифидир.