Nariman Abdulvaap Taşkentke yaqın, Çırçıq şeerinde (Özbekstan) doğdı, 1954 senesi dekabr 22-de. Abdulvaaplar qorantası 1975 senesi kommunistler nizamınıñ (sicteminiñ) yapqan, köstergen misli yoq manialarına – zorbalıqlarına baqmadan, olar kendi altın Beşigine – Qırımğa qayttılar. Nariman Abdulvaap orta mektepni bitirgen soñra Harkov şeerinde Petro Kotlârovskiy adına Sañat institutınıñ kemane çalğı aleti em de Aqmescid (Simferopol) devlet universitetiniñ (şimdi Tavriya milliy universiteti) qırımtatar ve rus filologiyası bölüklerinde tasil aldı.

Bugün de – bugün Nariman Abdulvaap Qırım müendislik ve pedagogika universitetinde muallim em de qırım tili, edebiyatı, tarihı ve medeniyeti merkezinde üyken ilmiy hadim vazifelerinde faaliyet köstermekte. Genç alim, bir sıra ilmiy-ameliy halqara konferensiyalarda, simpoziumlarda iştirak eterek, özüniñ ğayet meraqlı – mündericeli ilmiy işlerile çıqışlar yapıp kelmekte ve aynı zamanda o, ilim-fen dünyasınıñ alğışını qazanmaqta.

Endi bayağı bir tarihiy-etnografiya araştırmalarda (ekspeditsiyalarda) iştirak etken Nariman Abdulvaap "Bahçisarayskaya knijnaya kollektsiya v Rossiysköy natsionalnoy biblioteke" monografiyasını ve "Grözı lübvi. Poeziya krımskih hanov i poetov ih kruga" serlevalı antologiya kitaplarını neşirden çıqardı. Bundan ğayrı o edebiyat, siyasiy-medeniy tarih, İslâm ve tasavvuf, sañat… mevzularda "Qırımlı alim ve şeyhleri (XIV – XIX asırlar)", "Şahin Geray ve qalp şeklindeki ğazeli", "Aşıq Ümerge dair Kezlevli İbraim Tulevniñ hatırlavları" kibi yetmişten ziyade ilmiy işlerniñ – maqalelerniñ müellifidir.