Кунеш эр кунь бир кере

Санъа дёне

Узеринъе

Шавлелер сачмакъ ичюн.

Гультереклер

Баарьде ешиллене,

Яраштырып,

Юзюнъде ачмакъ ичюн.

Дерьялардан ала сув,

Дагъдан ава –

Сенден чыкъкъан булутлар

Санъа ява!

Инсан да шай:

Гуллерден,

Емишлерден,

Емегинъден,

Сендеки емишлерден;

Сувларынъдан,

Аванъдан,

Нурларынъдан

Хазиненъе топлангъан йырларынъдан

Гъыда ала озюне,

Джыя кучюн –

Кене санъа къайтарып

Бермек ичюн!

Сенинъ багъчанъда осе

Чешит гуллер, Мерданем.

Меним багърымда исе

Ачаджагъы бир дане.

Севип осьтюрдигим гуль –

Гузеллерден гузели.

Бу узюльген гуль дегиль –

Сен озюнъсинъ, Гузелим!

Истер исенъ

Ёлларда юр,

Истер исенъ уч…

Истер

Яша мекянынъда,

Истер исенъ кочь –

Яшлыгъынъда

Севип-сайып,

Къавушалмасанъ,

Асретликте ах чекмеси

Оксюзликтен кучь!

Севгилинъе

Ёл тапалмай,

Айрылып къалсанъ,

Йырымны

Бас багъырынъа –

Аврунъы алсын.

Мурадынъа мани олса

Буюк озенлер,

Оть Азизим,

Бу сатырлар

Копюринъ олсун!

Дагъларынънен ольченир

Боюм-эним,

Севингенде

Сендеки енъишлерге.

Онъып-оськен гонълюмде

Ватан, сенинъ

Чёллеринънинъ

Азамат кенишлиги!

Сенинъ аятынъдам мен,

Гуллеринъдем,

Азиз геджелеринъдем,

Куньлеринъдем!

Сакин юзюмни охшап,

Нефесимни

Алып кезген

Тендюрист еллеринъдем!

Чешит чечеклеринънинъ

Тюсюндем мен,

Изим къалгъан ёлларынъ

Эсиндем мен!

Аят киби ёрулмай,

Чабик акъкъан

Нарын далгъаларынынъ

Сесиндем мен!

Узеринъде къуббенънинъ

Мавысындам,

Онынъ кенишлигиндем,

Авасындам!

Ерни якъмакъ истеген

Къатиллерге

Дост халкъларнынъ

Котерген садасындам!

Булутларнынъ астында

Чаткъал башы,

Андан санъа

Севинип бакъкъан меним!

Каналларнынъ ичинден

Толып-ташып,

Чёллеринъе даима,

Акъкъан – меним!

Буюк акърабалыкъ бу!

Гъурурланам!

Ватанымда кок кибим,

Ер кибим, деп!

Чюнки сенинъ нефесинъ,

Сувынъ,

Къанынъ –

Меним арекетимде,

Теркибимде.

Ягъ устюме, башыма.

Уймелен, къар, уймелен.

Самайыма, къашыма

Чечек олып тюймелен.

Отькен йылда элемлер

Къалсынлар, къар, астынъда.

Зиялансын умютлер

Килиминъе баскъанда.

Тааджипленип бакъам акъ,

Назик орьнеклеринъе.

Темизлигинъ бенъзей пак

Инсан юреклерине.

Сен – аязнынъ бахшышы,

Коктен энген Инджисинъ,

Марамалар нагъышы

Киби телли, инджесинъ.

Сен кокте токъугъан

Яш къызларнынъ элими?

Орьнеклеринъ кълабдан

Сачларынынъ телими?

Не къадар къар орьнеги

Энсе коктен бизлерге –

О къадар бахт корьмеге

Къысмет олсун козьлерге!

Ягъынъ къарлар башыма,

Тойынъызда ойнайым!

Ёлларымнынъ ташына

Тёшелинъиз, бойлайым!

Экимиз де юремиз биз,

Сув акъкъандай озенде.

Мен, бу дюнья узеринде,

Сен исе кок юзюнде.

Инсан киби задсынъ, Терек,

Тек, ёрулсанъ, ятмайсынъ.

Эм динълейсинъ, эм анълайсынъ,

Олгъаны сёз къатмайсынъ…

Къуванасынъ, япрагъынъны

Тепретип ель эскенде.

Ынджынасынъ инсан киби,

Пытагъынъны кескенде.

Олар, сенинъ берекетли

Юк котерген къолларынъ,

Эм де кениш кок юзюнде

Барып кельген ёлларынъ.

Кельсем, дейсинъ: - Буюр, Ярем,

Зияфетке, талдама! –

Мейва баскъан пытакъларынъ

Эгилелер алдыма!

Улу Ашыкъ Умэр язгъан

Шиирининъ сырасы

Киби – татлы, сен асрагъан

Мейваларнынъ шырасы!

Гонъюлим,

Къанатлар такътыгъынъ киби,

Юксельме!

Алчакъ уч

Такъдирим киби.

Йырларда сесинъ де

Чагъласын сакин –

Чокъракънынъ сувлары

Акътыгъы киби!

Баарьнинъ йырында

Нефасетке бакъ –

Къафие,

Везини

Не гузель келише:

Бир сатыр сонъунда

Ачса акъбардакъ,

Дигери сонъунда

Ача мелевшее!

Ватаннынъ

Къайсы бир якъында олсакъ да,

Эсапкъа алманъыз месафени сиз!

Йырымны

Окъугъан дакъкъанъыз узакъта

Дегиль де,

Эвимде –

Мусафиримсиз!

Шиирлер сайылса

Юрекке тийген саз,

Ойларым сыгъармы

Бу бир къач данеге?!

Гонъюлим дей манъа:

- Халкъ ичюн ойле яз –

Барсын бу эв дёнсин

М у с а ф и р х а н е г е!

Эр акъкъан сув

Кенди

Ялысына яр.

Эр терек астында

Салкъынлыгъы бар.

Дюньягъа

Къуш олуп догъгъаннынъ биле

Анагъа

Урьмети,

Якъынлыгъы бар.

Топракъ ёкъ,

Ава ёкъ,

Ичмеге сув ёкъ –

Эр эки къутупта

Амансыз сувукъ!

Бильмейим,

Халкъына

Огейлик беслеген

Махлюкънынъ гонъюли

Ангине джувукъ?

- Кунь булутсыз

Ве эм сакин…

Сувынъ мавы

Кок мавы –

Дерсинъ,

Уфукъ ёкътыр,

Сени

Девам эттире ава…

Бойле куньде

Коре инсан

Сенде кезген балыкъны,

Астынъдаки чакъыллар да

Тыпкъы –

Ренкли моюнджакъ…

Сувсап,

Санъа кельгенлерни

Ялынъда

Эр барлыкъны

Корем,

Акс эттиресинъ

Узеринъде боюнджа…

Мераметли мубарексинъ

Арареттен янгъангъа,

Меиль этсенъ,

Къураяткъан

Тамырларгъа сув ете!

Манъа да

Бир эйилик эйле

Эвлядымны анъгъанда,

Сёйле,

Сенде къалмадымы

Онынъ джанлы сурети?!

Ойларым! Менден сонъ

Келеджек йылларда

Юрерсиз Аятнен

Кенъ, айдын ёлларда…

Ал-хатир сорагъан

Самимий сёзлер

Оларакъ, достларгъа

Къалырсыз сизлер!

Наз талаб этерек

Асрагъан гулюне,

Ынджыткъан олсам мен

Достумнынъ гонълюни,

Корюшип олмасам,

Юмулса козьлер –

Сиз, Ондан эляллыкъ

Истенъиз Сёзлер!

Йыр –

Меним коксюмде

Янып, сёнмесе,

Йыр меним коксюмде

Орьселенмесе,

Улькеме беслеген

Муаббетлигимнен

Догъмаса –

Достларгъа етерми сеси?

Анадан

Дюньягъа кельгеним ярым.

Экинджи ярымым –

Азиз йырларым

Олсунлар, Ветаным,

Къабул эт менден,

Огюнъе

Баш эгип кельгенде ярын!

Къар киби марама ортюнген, Мискин…

Догъургъан, асрагъан-эвлятлар оськен…

О, емек пиширген, бурюшик эллер

Он джанлыкъ софранынъ отьмегин кескен…

Къонасы башында энди бир озю,

Эвлятлар козюнен расткельмей козю.

Дюньяда беш огълан, учь дюльбер къызгъа

Бенъзей бу кимсесиз Ананынъ юзю.

Къардашлар мезары, ешерген дере –

Онынъчюн дженклернинъ битмеген ери!

Джебэде къан тёккен федакярларны

Анъгъандыр, ким бильсин, куньде къач кере…

Топракънен орьтюльген секиз къабир,

Оларнен къалгъанлар такъдири-Къадир…

Яткъанда анъгъандыр, тургъанда анъгъандыр,

Анъгъандыр оларны ольгенге къадар!

Эй, Ёлджу! Бу шеит янында токъта!

Огюнде баш эгип борджунъны акъла.

Къаранлыкъ лятинни къапаткъан тахта

Артында асретлик, мерхамет сакълы!

Устюмде кунешнинъ нурлары эдинъиз…

Элиме, козюме, сёзюме эндинъиз!

Догъаджакъ йырларнен назлана-назлана,

Байылып, багърымда Инджиге дёндинъиз!

Сизлерден мубарек шевкъ алдым ёрулсам,

Зияде келирим олмады девримде.

Сайсынлар, джёнкимде къач дане йыр олса,

О къадар кере мен севиндим омрюмде!