Топчылар топ ата бильмез,

Йеничерилер дженкке гирмез,

Али Османдан имдат гельмез.

Ах, йесир олдыкъ, вах, йесир олдыкъ,

Дженкчи Москоф элинде!

* * *

Китаптан гечтик варымыз,

Султандан ёкъ имдадымыз,

Катерина дегиль мурадымыз.

Ах, йесир олдыкъ, вах, йесир олдыкъ,

Дженкчи Москоф элинде!

* * *

Исмет, бойледир язымыз,

Къан агълаюр Ветанымыз,

Артты бизим фигъанымыз.

Ах, йесир олдыкъ, вах, йесир олдыкъ,

Дженкчи Москоф элинде!

Кефе карантинден чыкъты бир атеш,

Ич кимседен ёкътыр ярдым Кефеге.

Дженк мейданы киби инъледи саваш,

Чокъ виляет языкъ деди Кефеге.

* * *

Агълашты джумлеси, шашты эр инсан,

Ай, вай этерек эйледи фигъан.

Къаплады Кефени этти пис зиндан.

Иришкейди бир идает Кефеге.

* * *

Джами иле кильселери къапалды,

Эр кес яшавдан, джанындан усланды.

Эп ольген олюлер атешке янды,

Ойле къопты бу къиямет Кефеге.

* * *

Эр кунь саба эким келир де бакъар,

Тюрлю сылтав иле бизлерни якъар.

«Пошёл дурак», дер де турмай о къачар,

Не ал олду, бу зеваллы – Кефеге.

* * *

Сокъакълар къапланды, кельмезлер эвге,

Оджакълар сёнгендир, пишмей аш, къаве.

Ур, ольдюр, кес башын, соралмаз дава,

Бильмем, не ерде къалды комендант агъа.

* * *

Къулунъдыр Исметий эй къадир Мевля,

Гедже-куньдюз этер шукюр эм дуа.

Сабий- субьян ичюн багъышла Худа,

Керем сенсинъ бер имдат Кефеге.