Belli qırım milliy şairi Cemil Kermençikliniñ oğlu Ercivan Kermençikli Gezleve (Kezlev) rayonınıñ Qızıl-Çolpan köyünde (Qırım) doğdu, 1924 senesi yanvar 28-de. O, iptidaiy – başlanğıç tasilni babasınıñ sınıfında aldı. Soñra bilgi aluv ceryanını ğayrı mektepte devam yaptı. Qurucılıq institutında oqudı. Sovet imperiyası gulagında beş yıl oturıp çıqtı. Doğmuş milletile beraber o, ceza (repressiya) yerlerinde, hususan Yañıyol şeerinde (Özbekstan) qurucılıq meydanlarında üyken müendis olup çalıştı.

Ercivan Kermençikli ömüriniñ soñuna qadar, (1994 senesi, yanvar 16-da Yañıyol şeerinde vefat etti), aziz qırım halqına, Vetanına ve onıñ tekrarlanmaz efsaneviy manzarasına, teren-bay tarihına, medeniyetine, dülber urf-adetlerine sadıq qaldı. Şairniñ lirik qaramanı onı Ana-Vetanından ayırğan facialı qurumnıñ unsurlarına nisbeten ve aynı zamanda milletine em de Vetanına nisbeten kendi munasebetini bildire. Mezkür munasebetler – fikirler kimerde açıqtan-açıq kösterilse, bazı da ise, olar qapalı bir şekilde ifadelenile. Yolunı şaşırğan "satqınlar"nı ise, babası Cemil Kermençikli kibi olarnı şıpırta, şiddetli-keskin sesle tenbiyley…

Bu yerde bir şeyni daa qayd etmeli ki, dülber qalbli şairniñ, yani Ercivan Kermençikliniñ yaratqan şiirlerini oquğanda, nasıldır bir adalet ve aynı zamanda acaybat-küreş dünyasına dalıp ketkeniñni duymay qalasıñ. Albu ise, doğrudan-doğru şairniñ babasından – Cemil Kermençikliden oğluna keçken icadiy nurnıñ timsalidir. Bu da, aqiqat.