Remzi Burnash
Born: June 17, 1920
Place of birth: Tavdayir, Simferopol (Crimea)
Died: 1982 (Namangan, Uzbekistan)
Şair, maarifçi, "Saqavlanma, ey, kaday" şiirniñ müellifi – Remzi Burnash
Men ömürimde çeşit insanlarnı kördim: küler yüznen adam öldürgen qatillerni, başqasınıñ çekişkeninde lezet alğan alçaqlarnı, pak adamlarnı kirlemek içün çeşit iftira mektüpleri yazğanfesatçılarnı, betiñe bir türlü, artıñdan başqa türlü aytqan munafıqlarnı… pek çoq çirkin tabiatlı adamlarnı kördim. Asılında, atta olar azlar, lâkin öyleleriniñ biri biñge yete. Biñde bir şöyle adam olsa, digerleri körünmey, tek o körüne. Men olarnı özümcesine uram, açıqlayım…
Remzi Burnash
Bütün ömür halqına hızmet etip kelgen şair em de muallim Remzi Burnaş Aqmescid rayonınıñ Tavdayır köyünde (Qırım) doğdu, 1920 senesi, iyün 17-de. O, Tavdayır köy mektebinde, Aqmescid şeeriniñ 13-nci nümüne mektebinde ve Yalta pedagogika tehnikumında (Qırım), Saratov universitetinde (Rusiye) tasil aldı. Remzi Burnaş Ekinci cian cenki cebelerinde duşman ile amansız küreşti, qan berip can aldı, defalarca ağır yaralandı. Sıra-sıra cenkâver ordenler ve medaller ile, bu cümleden Qızıl Yıldız ordenile taqdirlendi.
Remzi Burnaş özüniñ bütün añlı ömürini maarif saasına bağışladı. Ekinci cian cenkinden evel Qırım mekteplerinde, soñra ceza ceza (repressiya) yerlerinde – Narın ve Uçqurğan rayonları (Özbekstan) mekteplerinde oca çalıştı.
Remzi Burnaş maarif saasında çalışmaq ile bir sırada edebiy icad ile oğraştı. Onıñ adaletli qalemi astından acayip nazm satırlar doğdu. Şairniñ birinci şiirleri 1935 senesi "Yaş leninciler" jurnalında basıldı. Ebet, bundan soñ onıñ şiirleri, artı üzülmeden çeşit matbuat saifelerinde derc olunıp barıldı. Soñra, şairniñ şiirleri "Edep çoqrağı", "Yürek yırları", "Mayıs sabası" kibi cıyıntıqlardan yer aldılar.
Remzi Burnaşnıñ nazmiyetindeki lirik qaramanlar ayatnıñ – ömürniñ – tabiatnıñ tekrarlanmaz güzelligine, dülberligine suqlanalar ve aynı zamanda şu dülber ayatta, ömürde, tabiatta rastkelingen çeşit mürekkep – uyğunsız vaqialarğa nisbeten kendi munasebetlerini bildireler ve ilâhre, ve ilâhre…
Bu yerde bir şeyni daa söylep keçmeli ki, qırım halqınıñ ceza (repressiya) yerlerinde, hususan Merkeziy Asiyada – Taşkentte (Özbekstan) meydanğa kelgen meşur qırım milliy Haytarma oyun ve yır ansambliniñ repertuarından Remzi Burnaşnıñ şiiri temelli yer alğan edi. Haytarma oyun ve yır ansambliniñ artisti – alıp barıcısı (konferansye) Ablâmit Ümerov şairniñ "Saqavlanma, ey, kaday" şiirini ğayet yüksek mearetle, aqiqiy teatro artistine has ustalıqle ağızdan oquy edi. Büyük sañatkâr Ablâmit Ümerov icrasındaki "Saqavlanma, ey, kaday" şiiri er vaqıt seyirciler ile rıqma-rıq tolu olğan zallar tarafından artı üzülmegen gürdeli elçırpmalarle, "bis"ler ile alğışlana edi. Bu da aqiqat!..
Edebiyatta silinmez iz qaldırğan şair ve maarifçi Remzi Burnaş Namangan velâyetiniñ (Özbekstan) Haqqulabad qasabasında vefat etti, 1982 senesi.
- Remzi Burnaş. Yürek yırları. Taşkent. 1970.
- Remzi Burnaş. Edep çoqrağı. Taşkent. 1975.
- Remzi Burnaş. Şiirler. "Yıldız" jurn. 1980. № 4.
- Remzi Burnaş. Mayıs sabası. Taşkent. 1981.
- Duyğular çerçivesi. "Yıldız" jurn. 1990. № 6.
- Remzi Burnaş. Ayuv-Dağ efsanesi. "Yıldız" jurn. 1991. № 4.