Büyükanam Ayvasıllı,

Aziz anam Gaspralı,

Babam doğma Autkalı,

Men yazılmış Yaltalı.

Dağcılardır Qızıltaştan,

Yaşadılar yalıboyda

Bugün ise, Qırımda

Tamırı çoq olardan.

Çöl tarafı maña yaqın,

Qarışıldı qanımız…

Çeşit türlü qabileden

Yaratıldı halqımız.

"Tatar" deseñ – añlamayım

Ya olar da kim eken?

Men bu yerli – qırımlıyım

Qırım adımnı bilem.

Halqımıznıñ bir tili bar,

O da Qırım sözünden –

Qırım, qırım qırımlılar…

Lağap çıqtı közümden.

Qırım bizim Vetanımız,

Qırım bizim tilimiz,

Qırım bizim milletimiz,

Candan sevgen ilimiz!