Timsah endi yuquğa dalğanda, kimdir onıñ başına ayaqapnı attı!

"Bu kimniñ ayaqapı?!" – dedi Timsah açuvnen fısıldap. Bu arada Timsahnıñ başına böyle bir fikir keldi: "Belki de bu ayaqap Baqanıñ ayaqabıdır. Timsah Baqağa baqıp:

– Baqa, bu seniñ ayaqabıñmı!? – soradı ondan qattı sesnen.

– Yeq-q-q-q menim degil! – dedi Baqa asabiyleşip. – Menim ayağ-ğ-ğ-ım bu büyük ayaq-q-qap içün pek ufaq-q-q-q!

Baqa şimdi Timsah qarşısında qorqudan titrep başladı.

– Öylemi? – dedi Timsah ve Baqanıñ yanından ketti.

Endi onıñ başında başqa bir fikir doğdu: "Bu ayaqap Devequşnıñ ayaqapı olmalıdır", degen fikir keldi.

Timsah Devequşnı çağırdı:

– Devequş, bu ayaqap seniñkimi?

– Tes-s-süf ki. menim ayağım o keñ ayaqqap içün pek ince ols-s-s-sa kerek! – telâşlı sesnen oña cevap berdi Devequş.

– Öylemi?.. Grrrrr... – dedi Timsah ve açuvından quturıp başladı. – Belki o Tavşannıñ ayaqabıdır.

– Bu kimnin ayaqabı?! – qaba davuşnen muracaat etti Timsah tavşanlarğa.

Tavşanlar qorqudan titremege başladılar.

– Yoq! Yoq! Biz-z-zim ayaqlarımız-z-z bu ayaqapqa pek uz-z-zun kele! – dediler olar. – O ayaqap biz-z-zge aslı da doğru kelmez!

– Öylesem, bu kimniñ ayaqabı? Bu ayaqapnıñ mıtlaqa bir de-bir saibi olmaq kerek! – dep tüşündi Timsah ve açuvından özüne yer tapıp olamadı.

Tamam bu vaqıtta onıñ yanından Yılan süyreklenip keçmekte edi. Timsah oña fısıldap dedi:

– Yılan, bu ayaqap s-s-seniñ olsa kerek, öylemi!?

Yılan onıñ fsıldısından tutuqlanmağa başladı ve dedi:

– Ş-ş-şaş-tıñmı... Menim ayaqlarım bile yoq!

Timsah utanğanından Yılannıñ yanından çevirilip ketti.

Timsah ayaqapnı oña kim atqanını şay da añlap olamadı!

– Bu ayaqap kimniñ olğanını bilse edim, onıñ saibine kendi aqılımdan bir parçasını berir edim! – dep qıçırdı Timsah.

Bu arada onıñ yanında apansızdan Arslan peyda oldu.

– Men ayaqabımñı qıdıram, – dedi Arslan. – Timsah, sen menim ayaqabımnı körmediñmi?

Timsah qorqudan titrep omuzlarını qıstı ve böyle dedi:

– Bugün s-s-sab-b-b-badan b-berli men iç b-bir ayaqab-b körmedim.

Arslan onıñ yanından ketken soñ, Timsah biraz tınçlanğan kibi oldu.

O: "Endi bu ayaqapnı ne yapmalı?" dep tüşündi. Birazdan ise:

"Yahşı, – dedi Timsah öz-özüne. – Kimdir maña bu ayaqapnı taşladı. Endi öyle yapmaq, menim nevbetim.

Soñ ayaqap kene avağa uçtı...

– Gr-r-r-r! – ğırıldadı Ayuv, – bu kimniñ ayaqabı eken?!