Юртта ягъмур ягъа, дейлер…

Ах, шу ягъмур олса эдим!

Догъуп оськен диярыма

Къанып-къанып ягъса эдим!

Итирамнен, тамчы-тамчы

Топрагъына синъсе эдим.

Козьлеримден къуванч толу

Козьяшларны сильсе эдим.

Гульчехрели Ветанымнынъ

Гулюне зар этти залым.

Куль тобели койчигимнинъ

Кулюне зар этти залым.

Джеэннемий къарарынен

Дюньяны там этти бизге.

Тутып алып юртумызны

Гъурбетни «яр» этти бизге.

Чексиз беля башымызгъа,

Къая киби, авдарылды.

Гъурбет иллер эсамесиз

Къабирлернен толдурылды.

Юртта ягъмур ягъа, дейлер –

Ах, шу ягъмур олса эдим…

Хакъ, ниметлер сырасында

Къыбла берген, Сырт берген.

Шаркънен Баты арасында

«Къырым» адлы юрт берген.

О бизимчюн къальби темиз

Азиз Ана, Атадыр.

Ябанларгъа о тек денъиз,

Къырымларгъа – Ветандыр.

Дёнсе биле кунь геджеге,

Къан къустурса земане.

Юрт такъдири, келеджеги

Сеннен манъа эманет.

Тюшюнгенде ярынынъны

Гъамгъа инам къошула:

Танъры кенди къарарыны

Лягъу этмез, ИНШАЛЛА!

Танърым, бизге кучь-къувет бер, тёзюм.

Багъышла Ешиль Юртумыздан гъайры

Немиз бар бизим?!

Артыкъ бир-биримизге ич олмайыкъ зар,

Ер юзюнде бизден гъайры

Онынъ кими бар?

Танърым, бир-биримизге бизни ойле къат,

Душманымыз айырмагъа булмасын фурсат.

***

Къанлы пычакъ.

Менълибай.

Токъ черели

Сары ай.

Дертли Къырым

Кокюнде

Дерсизликтен

Йылтырай.

***

Манъа тешриф буюргъандже

Ильхам периси, –

Сыдырылды шииримнинъ

Къат-къат тириси…

Тёкюльген япракъта

Алтыннынъ тюсю бар.

Япракъсыз теректе

Одуннынъ тюсю бар.

Ич-багъыр къармалай

Иблиснинъ къармагъы.

Яланнен пуллангъан

Джадынынъ дувагъы.

Эджельдай сим-сия

Кокюмнинъ чырайы.

Ер-дуракъ тапалмай

Чёлюмнинъ къорайы.

Бош кочьлер темсили

Олса да хош исми,

Юртуны терк этмей

Не исми, не джисми.

Тилим – гулюм, бизден гъайры

Кимсе сени къокъламайджакъ.

Солып биткенинъни корип,

Эвалынъны сорамайджакъ.

Ич бир вакъыт эшитмедим

Шенъ ве сербест кульгенинъни.

Санъки дерсинъ, чевре-этраф

Истей сенинъ ольгенинъни.

Санки дерсинъ, бирер ханджер

Туттырып эр биримизге

«Ольдюр Ана тилинъни», – деп

Эмир эте дюнья бизге.

Акъкъа къара бериле, татлыкъа – аджджы.

Къырыджыгъа абиде тиклей къуруджы.

Бугунь илян эттирте ахлякъий къытлыкъ:

Сюргюн – шевкъат орьнеги, ишгъаль – азатлыкъ.