Qırım milliy edebiyatınıñ körümli erbabı – yazıcı, dramaturg, publitsist Yusuf Bolat 1909 senesi mart 16-da Qırımnıñ Aluşta şeerinde doğdı. İptidaiy mektepni bitirgen soñ Yalta pedagogika tehnikumında, Aqmescid (Simferopol) pedagogika institutında, soñra aspiranturada tasil aldı.

Yusuf Bolat teren bilgili şahs sıfatında, zengin ömür basamaqlarını basıp keçti. O Qırım devlet neşriyatında siyasiy edebiyat boyunca muarrir, Qırım Yazıcıları birliginde mesül kâtip, "Sovet edebiyatı" jurnalında muarrir vazifelerinde bulundı. Ekinci cian cenki başlağan soñ, Yusuf Bolat Sovetler Birligi Tış işleri Halq Komissarlığında Yaqın Şarq meseleleri boyunca referent vazifesinde faaliyet kösterdi. O Krasnodar şeerinde, Qırımnıñ ealisi içün çıqarılğan "Qızıl Qırım" gazetasında muarrir muavini, soñra Bütünittifaq radiokomitetinde, almanlar tarafından işğal etilgen ülkeler içün berilgen radioeşittirüvlerniñ mesül muarriri olaraq çalıştı.

Yusuf Bolat dogmuş halqı ile beraber, ceza yerlerinde facialı yıllarnı başından keçirdi. O anda Özbekstan Yazıcıları birliginde konsultant, soñra imperiya çerçivesinde qırım tilinde çıqqan yekâne "Lenin bayrağa" gazetasında muarrir muavini (1961 – 1982) olıp çalıştı. O em çalıştı, em de icad ile oğraşıp, ölmez eserler yarattı.

Yusuf Bolat, 1929 senesi özüniñ "Çañlar qaqılğanda" serlevalı ilki ikâyesi ile edebiyat dünyasına kelip kirdi. Bundan soñ onıñ gürdeli icadı başlandı. Yusuf Bolat edebâtnıñ aman-aman bütün janrlarında faaliyet kösterdi. Onıñ "Küzde yapraq tökülir" şiirine kompozitor İlyas Bahşış tarafından muzıka yazılğan yır, endi halq türküsine çevirildi desek aslı da mubalâğa olmaz. Nazmiyetten ğayrı o "Arzı qız", "İşlegen – tişler", "Toy devam ete", "Soñki gece", "Yaşamaq isteyim", "Deñiz dalğasız olmaz", "Dubaralı toy" kibi sıra-sıra pyesalar yarattı. "Saf yürekler", "Anife", "Sadaqat", "Alim" kibi romanlar yazdı.

Yusuf Bolatnıñ qalemi astından iri kölemde eserler ile birlikte bir talay ikâyeler, publikatsiyalar doğdı.

Büyük icadkâr – büyük qalem saibi Yusuf Bolat, olsun nesirde ya da dramaturgiyada, nazmiyette ya da publitsistikada o özüniñ bütün bilgisini, iradesini, istidatını qoyıp çalıştı. Kendisiniñ ve halqınıñ yüregini raatsızlağan ğayelerni – fikirlerni ifadelemege tırıştı. Edip özüniñ teren felsefesini ebediyetten yer alğan eserlerindeki obrazlar vastası ile beyan etti.

Yusuf Bolat 1986 senesi, ceza yerlerinde közlerini ebediy yumdı. Büyük edip, Taşkent şeerindeki Dombrabad caddesi mezarlığında cıyıldı.